BAKI, AzerVoice
Avropa İttifaqında siqaretlər, tütün və purolarla yanaşı, elektron siqaretlər və nikotin paketlərinə də xüsusi istehlak vergisi tətbiq olunması üçün təzyiqlər artır.
AzerVoice xəbər verir ki, ötən həftə 15 ölkənin maliyyə və iqtisadiyyat naziri Avropa Komissiyasının Prezidenti Ursula von der Leyenə məktub göndərərək məsələni gündəmə gətirib.
Yeni təklifə görə, ənənəvi siqaretlərdə olduğu kimi, elektron siqaretlər və nikotin paketləri üçün də ilk dəfə minimum səviyyədə xüsusi istehlak vergisi tətbiq ediləcək.
Avropa Komissiyası uzun müddətdir gözlənilən Tütün Vergitutma Direktivini (TTD) hələ də yayımlamayıb.
Ekspertlər 2011-ci ildən bəri direktivin yenilənmədiyini və yeni nikotin məhsullarının bazara daxil olduğunu vurğulayırlar. 2022-ci ildə qəbul olunan Avropanın Xərçəngi Yox Etmə Planı çərçivəsində bu məhsulların da vergi tənzimləmələrinə daxil edilməsi təklif olunmuşdu.
Mart ayında 12 ölkənin səhiyyə naziri Avropa Komissiyasına müraciət edərək tütünlə bağlı bütün qaydaların o cümlədən vergi məsələlərinin yenidən nəzərdən keçirilməsini istəyib. Ötən həftə isə 15 ölkənin maliyyə və iqtisadiyyat naziri Ursula von der Leyenə məktub göndərərək Tütün Vergitutma Direktivinin yenilənməsini tələb edib.
Bundan sonra vergi məsələlərinə cavabdeh olan Komissar Vopke Hoekstra, qaydaların yaxın vaxtlarda dəyişəcəyinə ümid etdiyini bildirib.
Yeni qaydalar ənənəvi siqaretlər üçün vergiləri artırmaqla yanaşı, elektron siqaretlər və nikotin paketləri kimi məhsullara da xüsusi istehlak vergisi tətbiq edəcək.
