BAKI, AzerVoice, Nərmin Ağayeva

Stanford alimləri iflic olan insanlara yalnız düşünərək ünsiyyət imkanı verən yeni beyin çipi hazırlayıb.

AzerVoice xəbər verir ki, ABŞ-ın Stanford Universitetində aparılan araşdırmalar daxili səsi deşifrə edə bilən beyin-kompüter interfeysinin (BCI) yaradıldığını göstərib. Cell jurnalında dərc olunan tədqiqatda texnologiyanın daxili nitqi 74 faizə qədər dəqiqliklə oxuya bildiyi, eyni zamanda təhlükəsizlik üçün parolla işlədiyi vurğulanır.

Məlumata görə, ALS və beyin sapı insultuna görə danışa bilməyən dörd şəxsin motor korteksinə mikroelektrodlar yerləşdirilib. Süni intellektin köməyi ilə beyin siqnalları təhlil olunaraq iştirakçıların düşündükləri sözlər deşifrə edilib. “Chitty chitty bang bang” ifadəsi parol kimi istifadə edilərək sistemin yalnız istifadəçi istədiyi zaman aktivləşməsi təmin olunub.

Qeyd edək ki, bu texnologiya ciddi nitq iflicindən əziyyət çəkən insanlara nitqə yaxın təbii ünsiyyət imkanı yarada bilər.