BAKI, AzerVoice, Nailə Babazadə
ABŞ Dövlət katibi Rubio, Böyük Britaniyadakı həmkarı Cooper ilə telefon danışığında Trampın İsrailli girovların azad edilməsi və Qəzzada atəşkəsi əhatə edən 20 maddəlik planının həyata keçirilməsinin vacibliyinə diqqət çəkib.
AzerVoice xəbər verir ki, ABŞ Dövlət Departamenti Rubio ilə Cooper arasında keçirilən telefon danışığı ilə bağlı yazılı açıqlama yayıb.
Görüşdə həmçinin Rusiya–Ukrayna müharibəsinə də toxunulduğu, tərəflərin bu münaqişəni danışıqlar vasitəsilə əldə ediləcək bir həll və davamlı sülh yolu ilə bitirmək üçün diplomatik səyləri davam etdirmək barədə razılığa gəldikləri qeyd olunub.
Qeyd edək ki, ABŞ Prezidenti Donald Tramp 29 sentyabrda israilli girovların azad edilməsi və Qəzzada atəşkəsi əhatə edən 20 maddəlik plan təqdim etmişdi. HƏMAS isə 3 oktyabrda Trampın Qəzza planındakı girov mübadiləsini qəbul etdiyini, lakin digər bəzi maddələrin müzakirə edilməli olduğunu bildirmişdi.
Tramp 4 oktyabrda sosial media hesabında yayımladığı video müraciətində HƏMAS-ın davamlı sülh istədiyinə inandığını və İsrailin girovların azad edilməsi üçün Qəzzaya hücumlarını dərhal dayandırmalı olduğunu vurğulamışdı.
İsrail Baş Nazirliyinin Ofisindən verilən açıqlamada isə Təl-Əviv rəhbərliyinin Qəzzadakı girovların azad olunması üçün planın ilk mərhələsini həyata keçirməyə hazırlaşdığı qeyd edilib. HƏMAS və İsrail nümayəndə heyətlərinin 5 oktyabrda girov mübadiləsi və Qəzzada atəşkəs danışıqları üçün Misirə çatdığı, 6 oktyabrda isə Şarm əl-Şeyx şəhərində atəşkəs danışıqlarına başlanıldığı bildirilib.
