BAKI, AzerVoice, Nailə Babazadə
ABŞ, Belçikada son vaxtlar artan dron fəaliyyətinə qarşı mübarizə aparmaq üçün dəstək təklifi edib.
AzerVoice xəbər verir ki, Belçikanın yüksək tirajlı qəzeti Le Soirın məlumatına görə, Almaniya, Fransa və İngiltərədən sonra ABŞ da Belçikaya yardım təklifi irəli sürüb.
Müdafiə naziri Teo Franken Nümayəndələr Palatasında çıxışı zamanı ölkənin kritik bölgələrində müşahidə olunan icazəsiz dron uçuşlarına qarşı “müttəfiq ölkələrlə koordinasiyalı təhlükəsizlik addımı” həyata keçirildiyini bildirib.
Franken, Belçikanın qonşu ölkələrdən xüsusi anti-dron qrupları tələb etdiyini vurğulayaraq, “Almaniya, İngiltərə və Fransa müsbət cavab verdi və xüsusi avadanlıqları ilə hazırda Belçika ərazisində yerləşdirilib,” deyib.
Müdafiə naziri bu birliklərin texniki avadanlıq, aşkarlama sistemləri və hava məkanı təhlükəsizliyi sahəsində fəal dəstək göstərdiyini qeyd edib.
“Hazırda amerikalı rəsmilərlə yardımın necə, harada və hansı həcmlə ən effektiv şəkildə yerləşdirilə biləcəyini qiymətləndiririk.” - deyə Franken əlavə edib.
Polşa, Rumıniya, Estoniya və Danimarkadan sonra, AB qurumlarına və NATO-ya ev sahibliyi edən Belçikanın gündəmində də dronlar mühüm yer tutur.
3 oktyabrda Belçikadakı Elsenborn Hərbi Təlim Düşərgəsi üzərində dron fəaliyyəti aşkar edilmiş, Müdafiə Nazirliyi hadisəni araşdırmağa başlamışdı.
25 oktyabrda isə Valon bölgəsindəki Marche-en-Famenne şəhərində yerləşən Kral Albert Hərbi Bazası üzərində ən azı 4 dronun müşahidə edildiyi bildirilmişdi.
1 noyabr gecəsi həm milli, həm də NATO əməliyyatlarında istifadə edilən Kleine Brogel Hərbi Hava Bazasında 3 dronun fəaliyyəti qeydə alınmış, 2 noyabr axşamı isə eyni bazada 4 dron görünmüşdü. Bu həftə ərzində Liege Hava Limanında iki dəfə dron aşkarlanmış və təhlükəsizlik səbəbilə uçuşlar dayandırılmışdı.
4 və 6 noyabrda Brüssel Hava Limanında gecə saatlarında dronlar görülmüş, hava hərəkətində gecikmələr yaşanmışdı.Belçikada dron təhlükəsi
10 noyabrda isə Doel Atom Elektrik Stansiyası və Liege Hava Limanı üzərində dron fəaliyyətinin qeydə alındığı bildirilib.
6 noyabrda toplanan Belçika Milli Təhlükəsizlik Şurası isə şübhəli dronların lazım gəldikdə polis və ya ordu müdaxiləsi ilə zərərsizləşdirilə biləcəyinə dair qərar qəbul etmişdi. Şura həmçinin bu təhdidlə mübarizə üçün Milli Hava Məkanı Təhlükəsizlik Mərkəzinin (NASC) 1 yanvar 2026-cı ilədək tam fəaliyyətə başlayacağını elan etmişdi.
