BAKI, AzerVoice, Nailə Babazadə
Beynəlxalq Atom Enerjisi Agentliyinin (MAQATE) İdarə Heyəti İranın nüvə obyektləri və zənginləşdirilmiş uran ehtiyatları ilə bağlı məlumat və giriş tələblərini əhatə edən qətnaməni qəbul edib.
AzerVoice xəbər verir ki, qətnamə Böyük Britaniya, Fransa və Almaniya (E3) ilə ABŞ tərəfindən təqdim olunub və İranın son 5 aydır MAQATE tərəfindən yoxlanılmayan zənginləşdirilmiş uran ehtiyatlarının ciddi narahatlıq doğurduğu vurğulanıb.
Sənəddə BMT Təhlükəsizlik Şurasının qətnamələrinə uyğun olaraq İranın öz öhdəliklərini yerinə yetirməli olduğu qeyd edilir. Tehran hücuma məruz qalan nüvə obyektlərinə MAQATE müfəttişlərinin girişinə icazə verməyə və zənginləşdirilmiş uran ehtiyatları ilə bağlı məlumat təqdim etməyə çağırılır.
Qətnamədə MAQATE-nin baş direktoru Rafael Mariano Qrossidən İranın NPT (Nüvə Silahlarının Yayılmaması haqqında Müqavilə) üzrə təminat sazişi və “snapback” mexanizmi ilə yenidən qüvvəyə minmiş 6 BMT Təhlükəsizlik Şurası qətnaməsinə uyğunluq barədə İdarə Heyətinə müntəzəm hesabat verməsi tələb olunur.
Sənəddə həmçinin İranın 18 dekabr 2003-cü ildə imzaladığı Əlavə Protokolun müddəalarına tam əməl etməsi və bu öhdəlikləri gecikmədən yerinə yetirməsi çağırışı yer alır.
