BAKI, AzerVoice, Nailə Babazadə
İngiltərədə 382 mindən çox insanın rəsmi olaraq evsiz kimi qeydiyyata alındığı və bu göstəricinin son bir ildə 8 faiz yüksəldiyi bildirilib.
AzerVoice xəbər verir ki, evsiz insanlara sığınacaq dəstəyi və məsləhət xidməti göstərən “Shelter” yardım təşkilatı hökumətin məlumatlarına əsaslanaraq ölkədəki vəziyyətlə bağlı geniş hesabat dərc edib.
Hesabata görə, onların 175 mindən artıq uşaqlar olmaqla, ümumilikdə 382 min 618 nəfər evsizdir. Sənəddə vurğulanır ki, “rəsmi olaraq evsiz” kimi tanınanların sayı bir il ərzində “inanılmaz dərəcədə çoxalaraq” 8 faiz artıb.
İngiltərədə hazırda hər 153 nəfərdən biri evsizdir. Aparılan araşdırmalar göstərir ki, 350 mindən çox insan – əsasən uşaqlı ailələr – müvəqqəti yerləşdirmə məntəqələrində yaşayır və bu, indiyədək qeydə alınmış ən yüksək rəqəmdir.
Hesabatda qeyd olunur ki, ölkədə hər gecə 4 min 667 nəfər küçədə yatır və bu göstərici son bir ildə 20 faiz artıb.
İngiltərədəki evsizlərin yarısından çoxunun paytaxt Londonda yaşadığı, lakin ölkənin digər bölgələrində də evsizlik probleminin sürətlə böyüdüyü bildirilib.
