BAKI, AzerVoice, Nailə Babazadə
ABŞ-ın dövlət katibi Marko Rubio ilə Birləşmiş Ərəb Əmirliklərinin (BƏƏ) xarici işlər naziri Şeyx Abdullah bin Zayed Əl Nəhyan telefon danışığı zamanı Sudanda atəşkəsin təmin olunması məsələsini müzakirə ediblər.
AzerVoice xəbər verir ki, ABŞ Dövlət Departamentinin yaydığı açıqlamaya görə, Rubio və Al Nəhyan Sudandakı mövcud vəziyyəti dəyərləndirərək “humanitar atəşkəsin” vacibliyi barədə fikir mübadiləsi aparıblar.
Telefon danışığında həmçinin Yəməndə sabitliyin qorunmasının əhəmiyyəti və husilərlə mübarizə məsələsi də gündəmə gətirilib.
Qeyd edək ki, Sudan 15 aprel 2023-cü ildən etibarən ordu ilə xarici dəstək aldığı bildirilən Sürətli Dəstək Qüvvələri (RSF) arasında şiddətli toqquşmalara səhnə olur.
Ölkənin qərbində yerləşən Darfur bölgəsinin ən böyük şəhəri olan Faşir intensiv döyüşlərdən sonra böyük ölçüdə RSF-nin nəzarətinə keçib.
On minlərlə insanın toqquşmalar səbəbindən şəhəri tərk etdiyi bildirilir. RSF döyüşçülərinin mülki şəxsləri zorla köçürdüyü, silahsız insanları öldürdüyü və işgəncələrə məruz qoyduğu anlar qrup üzvlərinin paylaşdığı videolarda əks olunub.
