BAKI, AzerVoice, Nailə Babazadə
Rusiya Prezidenti Vladimir Putin və İran Prezidenti Məsud Pezeşkiyan arasında telefon danışığı baş tutub.
AzerVoice xəbər verir ki, Kremlin mətbuat xidmətinin yaydığı məlumata görə, liderlər regiondakı mövcud vəziyyəti və gərginliyin azaldılması yollarını müzakirə ediblər. Məsud Pezeşkiyan ölkəsindəki daxili vəziyyətin yaxşılaşdırılması istiqamətində görülən işlər barədə rusiyalı həmkarına məlumat verib. Tərəflər bölgədəki problemlərin yalnız siyasi və diplomatik yollarla həll edilməsinin vacibliyi barədə həmrəy olduqlarını vurğulayıblar.
Görüş zamanı Rusiya və İran arasında strateji tərəfdaşlığın gücləndirilməsi və müxtəlif sahələrdə birgə layihələrin həyata keçirilməsi qərara alınıb. Qeyd edək ki, Vladimir Putin bu telefon danışığından əvvəl İsrailin Baş naziri Benyamin Netanyahu ilə də əlaqə saxlayaraq Yaxın Şərqdəki son vəziyyəti müzakirə edib. Rusiya rəhbərliyi regionda genişmiqyaslı müharibənin qarşısını almaq üçün diplomatik təmaslarını intensivləşdirib.
