BAKI,AzerVoice, Nailə Babazadə
Fələstin Qızıl Aypara Cəmiyyətinin sözçüsü Raid ən-Nims Rəfah sərhəd keçid məntəqəsi vasitəsilə həyata keçirilməsi planlaşdırılan üçüncü qrup xəstə və yaralıların təxliyəsinin təxirə salındığını elan edib.
AzerVoice xəbər verir ki, sözçü mətbuata verdiyi açıqlamada Qəzza zolağının cənubundakı Xan Yunis şəhərində yerləşən Reabilitasiya Xəstəxanasından xəstələrin çıxarılması prosesinin dayandırılması barədə məlumat aldıqlarını bildirib.
Nims qeyd edib ki, Fələstin Qızıl Aypara Cəmiyyətinin briqadaları təxliyə üçün bütün texniki hazırlıqları görüb və təchiz olunmuş təcili tibbi yardım maşınları ilə hazır vəziyyətdə gözləyirdilər. Lakin Ümumdünya Səhiyyə Təşkilatından (ÜST) təxliyənin qeyri-müəyyən müddətə təxirə salındığı barədə bildiriş daxil olub. Sözçü təxliyənin dayandırılması üçün hər hansı konkret səbəbin göstərilmədiyini vurğulayıb.
Digər tərəfdən, İsrail ordusuna bağlı Fələstin Ərazilərində Hökumət Fəaliyyətlərinin Koordinasiyası Bölməsi (COGAT) Rəfah sərhəd məntəqəsinin əldə olunmuş razılaşmalara və İsrailin öhdəliklərinə uyğun olaraq bu səhər açıldığını iddia edib.
İsrail rəsmiləri təxliyənin baş tutmamasında Ümumdünya Səhiyyə Təşkilatını günahlandıraraq, təşkilatın prosedurlarla bağlı zəruri koordinasiya detallarını təqdim etmədiyini irəli sürüblər. COGAT-ın bəyanatında bildirilir ki, ÜST lazımi məlumatları təqdim etdikdən sonra xəstə və yaralıların Misirə keçidinə şərait yaradılacaq.
Xatırladaq ki, Qəzzada minlərlə ağır yaralı və xəstə tibbi imkanların yetərsizliyi səbəbindən təcili olaraq bölgədən kənarda müalicə olunmaq üçün növbə gözləyir.
