BAKI, AzerVoice, Fərid Mikayılov

BMT-nin Baş katibi Antonio Quterreş süni intellekt texnologiyalarının gələcəyinin məhdud sayda texnologiya milyarderlərinin qərarlarına həvalə edilə bilməyəcəyini bəyan edib.

AzerVoice xəbər verir ki, Antonio Quterreş Hindistanda keçirilən qlobal süni intellekt sammitində çıxışı zamanı texnologiya sektorunun rəhbərlərini sürətlə inkişaf edən bu sahəyə hamı üçün açıq çıxışı təmin edəcək 3 milyard dollarlıq qlobal fondun yaradılmasına dəstək verməyə çağırıb.

Baş katib bildirib ki, süni intellekt bütün insanlığa məxsus olmalıdır və onun gələcəyi bir neçə ölkənin və ya bir qrup milyarderin qərarlarından asılı qala bilməz. O, vaxtında addımlar atılmadığı təqdirdə qlobal bərabərsizliyin daha da dərinləşəcəyi barədə xəbərdarlıq edib.

Quterreş vurğulayıb ki, düzgün tətbiq edildiyi halda süni intellekt tibb sahəsində irəliləyişləri sürətləndirə, təhsil imkanlarını genişləndirə, ərzaq təhlükəsizliyini gücləndirə, iqlim tədbirlərinə və fəlakətlərə hazırlığa dəstək verə, həmçinin əsas ictimai xidmətlərə çıxışı yaxşılaşdıra bilər.

Eyni zamanda o, süni intellektin ayrı-seçkiliyi artırmaq, zərərli təsirləri gücləndirmək və istismar risklərini böyütmək potensialına da diqqət çəkib.

BMT süni intellekt üzrə qərarların qəbulunda ölkələrə dəstək vermək məqsədilə elmi-məsləhətçi qurum yaradıb. Quterreş qlobal nəzarət mexanizmlərinin və hesabatlılıq sistemlərinin formalaşdırılmasının vacibliyini vurğulayaraq “Qlobal Süni İntellekt Fondu”nun təsisini təklif edib.

Onun sözlərinə görə, 3 milyard dollar hədəfi bir texnologiya şirkətinin illik gəlirinin bir faizindən də azdır və bu, süni intellektin hamı üçün əlçatan olmasına sərf ediləcək kiçik məbləğdir.