BAKI, VOA, Nailə Babazadə
ABŞ, İranla yaşanan gərginliyin artması fonunda Aralıq dənizindən Oman dənizinə qədər uzanan strateji xətt boyunca hərbi varlığını maksimum dərəcədə gücləndirib.
VOA xəbər verir ki, açıq mənbə kəşfiyyat məlumatlarının təhlilinə əsasən, ABŞ regiondakı döyüş gəmilərinin sayını 23-ə çatdırıb. Bu hərbi cəmləşmə Aralıq dənizi, Adən körfəzi, Oman dənizi və Bəsrə körfəzini əhatə edən nəhəng bir ərazidə dislokasiya olunub.
Hazırda ABŞ-ın Aralıq dənizində 10, Oman dənizində 10, Bəsrə körfəzində 2 və Adən körfəzində 1 döyüş gəmisi xidmət aparır. Aralıq dənizində yerləşən qüvvələrin mərkəzində ABŞ-ın ən müasir nüvə enerjili təyyarə gəmisi olan USS Gerald R. Ford dayanır. 100 min tonluq bu nəhəng gəmi, 75-ə qədər qırıcı təyyarə daşıma qabiliyyəti və inkişaf etmiş radar sistemləri ilə bölgədəki mütləq hava üstünlüyünü təmin edir. Onu 8 ədəd "Arleigh Burke" sinfinə məxsus raket esminesləri müşayiət edir ki, bu gəmilər həm ballistik raketlərdən müdafiə, həm də quru hədəflərinə dəqiq zərbələr endirmək gücünə malikdir.
Oman dənizindəki 10 hərbi vahid arasında isə USS Abraham Lincoln təyyarə gəmisi və onu müşayiət edən 5 esmines xüsusi çəkiyə malikdir. Burada həmçinin sahil sularında və dar keçidlərdə çevik hərəkət edən "Independence" sinfinə məxsus sahil döyüş gəmiləri dislokasiya olunub. Donanmanın uzunmüddətli əməliyyat qabiliyyətini qorumaq üçün USS Kanawha və USS Carl M. Brashear kimi logistik təchizat gəmiləri dənizdə yanacaq və mühimmat ikmalını fasiləsiz həyata keçirir. ABŞ-ın bu miqyasda hərbi qüvvə toplaması, bölgədəki strateji dəniz yollarının təhlükəsizliyini təmin etmək və potensial təhdidlərə qarşı dərhal cavab vermək məqsədi daşıyır.
