BAKI, VOA, Nailə Babazadə
Hindistan hökuməti bölgədəki hərbi-siyasi vəziyyətin kəskinləşməsi və ABŞ-ın İrana qarşı hərbi əməliyyat keçirə biləcəyi barədə yayılan xəbərlərdən sonra öz vətəndaşlarına ölkəni tərk etmək barədə çağırış edib.
VOA xəbər verir ki, Hindistanın Tehrandakı Səfirliyi sosial media hesabları vasitəsilə paylaşdığı rəsmi bildirişdə İrandakı Hindistan vətəndaşlarına mövcud nəqliyyat vasitələrindən, o cümlədən kommersiya uçuşlarından istifadə edərək dərhal ölkədən çıxmağı tövsiyə edib
"İrandakı vəziyyətin inkişafını nəzərə alaraq, hazırda bu ölkədə olan Hindistan vətəndaşlarına mövcud nəqliyyat imkanları ilə İranı tərk etmələri tövsiyə olunur" — deyə Səfirliyin bəyanatında bildirilir.
Nazirliyin qiymətləndirmələrinə görə, hazırda İranda təxminən 10 min Hindistan vətəndaşı yaşayır və fəaliyyət göstərir. Bu xəbərdarlıq ABŞ-ın bölgədəki hərbi varlığını artırması və tərəflər arasında ritorikanın kəskinləşməsi fonunda ən ciddi preventiv addımlardan biri kimi qiymətləndirilir.
