BAKI, VOA, Nailə Babazadə
ABŞ-ın avtomobil istehsalçısı "Ford", "Explorer" modelinə aid 400 mindən çox SUV avtomobilini texniki nasazlıq səbəbindən geri çağıracağını elan edib.
VOA xəbər verir ki, ABŞ Milli Avtomobil Yolları Hərəkətinin Təhlükəsizliyi İdarəsindən (NHTSA) verilən açıqlamaya görə, sözügedən nəqliyyat vasitələrinin arxa asqı sistemindəki birləşdirici çubuqlarda qırılma riski aşkar edilib. Bu hissənin qırılmasının sürücünün idarəetməni itirməsinə və ciddi qəzalara yol aça biləcəyi xüsusi vurğulanıb.
"Ford"un təhlükəsizlik xəbərdarlığı yalnız "Explorer" modelləri ilə məhdudlaşmayıb. Şirkət həmçinin batareya nasazlıqları və qüsurlu əyləc pedalları səbəbindən daha 40 min 655 avtomobili geri çağıracaq. İstehsalçı qeyd edib ki, bütün təmir və hissələrin dəyişdirilməsi işləri səlahiyyətli dilerlərdə tamamilə ödənişsiz həyata keçiriləcək. Bu addım şirkətin istehlakçı təhlükəsizliyini təmin etmək və potensial hüquqi iddiaların qarşısını almaq strategiyasının tərkib hissəsidir.
