BAKI, VOA, Nailə Babazadə
Birləşmiş Millətlər Təşkilatının (BMT) Ukrayna üzrə Humanitar Yardım Koordinatoru Mattias Şmale, 2022-ci ilin fevral ayından bəri davam edən Rusiya-Ukrayna müharibəsinin beşinci ilinə qədəm qoyması ilə bağlı Cenevrədə həftəlik mətbuat konfransı keçirib.
VOA xəbər verir ki, Şmale bildirib ki, müharibənin yaratdığı ağır humanitar böhran nəticəsində hazırda Ukraynada 10,8 milyondan çox insan təcili humanitar yardıma ehtiyac duyur. Bu rəqəm ölkə əhalisinin təxminən dörddə birini təşkil edir və bura Rusiya tərəfindən işğal edilmiş ərazilərdə yaşayan bir milyona yaxın şəxs də daxildir.
Mattias Şmale Ukraynanın müharibədən sonrakı bərpası üçün tələb olunan maliyyə vəsaitinin miqyasını da açıqlayıb. O qeyd edib ki, ölkənin infrastrukturunun və sosial həyatının bərpası üçün 10 illik müddətdə təxminən 590 milyard dollar vəsait lazımdır. Bu məbləğ Ukraynanın ötən ilki ümumdaxili məhsulunun (ÜDM) üç qatına bərabərdir. Şmalenin sözlərinə görə, bərpa prosesi mütləq şəkildə insan mərkəzli və icma əsaslı aparılmalıdır, çünki müharibənin vurduğu mənəvi və fiziki yaraların sağaldılması böyük xərclər və uzun zaman tələb edir.
BMT rəsmisi 2025-ci ilin müharibə tarixinə mülki əhali üçün ən qanlı il kimi düşdüyünü xüsusi vurğulayıb. Verilən məlumata görə, ötən il ərzində ən azı 2 500 mülki şəxs həlak olub, 12 mindən çox insan isə yaralanıb. Bu göstərici 2024-cü illə müqayisədə mülki itkilərin 30 faizdən çox artması deməkdir. Şmale müharibənin gözlənilməz humanitar acılara səbəb olmağa davam etdiyini və hər keçən gün gələcəkdə bərpa prosesinin maliyyətini daha da artırdığını dilə gətirib.
