BAKI,VOA, Nailə Babazadə

İsraildə hava məkanının mərhələli şəkildə yenidən açılması ilə paytaxt Tel-Əvivdəki Ben Qurion beynəlxalq hava limanında uçuşların bərpa olunacağı elan edilib.

VOA xəbər verir ki, ölkənin iki yerli aviaşirkəti — "Israir" və "Arkia" uçuşlara başlayacaqlarını bəyan ediblər. "Israir" şirkəti cümə axşamı günü Roma, Berlin, Afina, Batumi və Rovaniemi şəhərlərindən Ben Qurion hava limanına beş reys həyata keçirməyi planlaşdırır.

Hava məkanı kademeli olaraq açılsa da, təhlükəsizlik mülahizələri ilə bağlı müəyyən məhdudiyyətlər qüvvədə qalır. İlkin mərhələdə hava limanına saatda yalnız bir sərnişin təyyarəsinin enişinə icazə veriləcəyi bildirilib.

Xatırladaq ki, İsrail hava məkanı regionda baş verən raket hücumları və hərbi gərginlik səbəbindən mülki uçuşlar üçün bağlanmışdı. Reyslərin bərpası ölkədəki nəqliyyat infrastrukturunun normal fəaliyyətə qayıtması istiqamətində ilk addım kimi qiymətləndirilir.