BAKI, VOA, Nailə Babazadə
UNICEF ötən həftəsonu ABŞ və İsrailin İrana qarşı başlatdığı hərbi əməliyyatlarla kəskinləşən gərginlikdə indiyədək 189 uşağın həyatını itirdiyini açıqlayıb. Təşkilatın hesabatında qeyd olunur ki, bölgədəki hərbi hərəkətlilik uşaqlar üzərində artıq dağıdıcı bir təsir yaradıb.
VOA xəbər verir ki, İran İslam İnqilabı Keşikçiləri Korpusu və yerli mənbələrin məlumatına görə, hücumların ilk günündə İranın cənubundakı Minab şəhərində yerləşən Şəcərə-i Tayyibə adlı qızlar ibtidai məktəbi vurulub. Hücum nəticəsində yaşları 7 ilə 12 arasında dəyişən azı 175 şagirdin həlak olduğu bildirilir. Görgü tanıqları və beynəlxalq mətbuat orqanları məktəbin bir hərbi kompleksin yaxınlığında yerləşdiyi üçün zərbəyə məruz qaldığını, lakin binanın tamamilə mülki məqsədlər üçün istifadə edildiyini təsdiqləyib.
UNICEF-in məlumatına görə, can itkiləri təkcə İranla məhdudlaşmır və münaqişənin miqyası genişləndikcə rəqəmlər artmaqda davam edir. İranın müxtəlif bölgələrində, o cümlədən Minabdakı məktəb hücumunda cəmi 181 uşaq həyatını itirib. Eyni zamanda son 24 saat ərzində Livanın müxtəlif bölgələrinə endirilən hava zərbələri nəticəsində 7 uşağın öldüyü, Küveytdə isə regional gərginliklə bağlı hadisələrdə 1 uşağın həlak olduğu qeydə alınıb. Təşkilat uşaqların müharibələri başlatmadığını, lakin ən ağır bədəli onların ödədiyini vurğulayaraq tərəfləri eskalasiyanı dayandırmağa çağırıb.
Məktəblərin və uşaqların beynəlxalq humanitar hüquq çərçivəsində mühafizə altında olduğu xatırladılan rəsmi bəyanatda, hərbi tərəflərə mülki şəxsləri qorumaq öhdəliyi bir daha xatırladılıb. Hazırda humanitar təşkilatlar zərər çəkmiş bölgələrdə uşaqlara təcili tibbi və psixoloji yardımın çatdırılması üçün yollar axtarır, lakin davam edən bombardmanlar bu prosesi çətinləşdirir.
