BAKI, VOA , Nailə Babazadə
İranın xarici işlər naziri Abbas Əraqçi "Al Jazeera" telekanalına verdiyi müsahibədə ölkəsinin ABŞ və İsrail ilə müharibədə geri çəkilməyəcəyini bəyan edib. Nazir İranın siyasi sisteminin güclü olduğunu və yüksək rütbəli rəsmilərin itkisinin dövləti sarsıtmayacağını vurğulayıb.
VOA xəbər verir ki, o, İranın yeni lideri Müctəba Xameneinin yaralanması xəbərinə münasibət bildirərək, liderin səhhətinin mükəmməl olduğunu və yalnız yüngül yaralar aldığını qeyd edib.
Əraqçi İranın hücumları başladan tərəf olmadığını, sadəcə ABŞ-İsrail zərbələrinə cavab verdiklərini bildirib.
"ABŞ bizə hücum edəndə raketlərimiz onların ərazisinə çatmır, buna görə də bölgədəki Amerika bazalarını vurmağa məcburuq. Təəssüf ki, bu bazalar dost qonşu ölkələrin ərazisində yerləşir". - deyə Əraqçi qeyd edib.
Nazir həmçinin qeyd edib ki, İran qonşu ölkələrdəki mülki hədəfləri qəsdən hədəf almır.
Atəşkəs təkliflərinə toxunan Əraqçi İranın mövqeyini izah edib.
"Biz atəşkəsi qəbul etmirik, çünki bu ssenarinin bir müddət sonra təkrarlanmasını istəmirik. Biz müharibənin tam və daimi olaraq sona çatmasını istəyirik. Əgər İranın dəymiş zərərini qarşılayacaq (təzminat) və müharibəni birdəfəlik bitirəcək bir təklif olarsa, onu dinləməyə hazırıq". - deyə nazir qeyd edib.
Nazir həmçinin Hörmüz boğazının ABŞ və İsrail ilə əlaqəli gəmilər üçün bağlı qalacağını, lakin müharibədən sonra bölgə ölkələrinin iştirakı ilə yeni bir protokolun hazırlana biləcəyini əlavə edib.
