BAKI,VOA, Fərid Mikayılov
ABŞ Dövlət Departamenti Küveytə LTAMDS hava müdafiə radar sistemlərinin satışını nəzərdə tutan mümkün xarici hərbi satışa ilkin razılıq verib.
VOA xəbər verir ki, satışın ümumi dəyərinin 8 milyard dollara qədər çatacağı bildirilir.
Məlumata görə, paketə səkkizədək hava müdafiə radarı, eləcə də əlaqəli avadanlıqlar, logistika dəstəyi və təlim xidmətləri daxildir.
Satış çərçivəsində həmçinin beş ədəd böyük taktiki enerji sistemi generatoru, dəstək vasitələri, qoşqu qurğuları, simulyatorlar, təhlükəsiz rabitə avadanlıqları, ehtiyat hissələri, diaqnostika vasitələri və texniki sənədlər də təqdim olunacaq.
Qeyd olunur ki, bu tədarük Küveytin mövcud hava müdafiə imkanlarının gücləndirilməsinə yönəlib. Yeni sistemlərin AN/MPQ-53 və AN/MPQ-65 radarlarına əsaslanan mövcud Patriot hava müdafiə sisteminə inteqrasiyası nəzərdə tutulur. Bu isə aşkarlama radiusunun genişlənməsinə və sistemin ümumi effektivliyinin artırılmasına imkan verə bilər.
Məlumata əsasən, LTAMDS radarları 360 dərəcə hava məkanına nəzarət etmək qabiliyyətinə malikdir və əvvəlki sistemlərlə müqayisədə daha yüksək operativ məlumatlılıq təmin edir. Sistem insanlı təyyarələr, qanadlı raketlər, hipersəs silahları və ballistik raketlər daxil olmaqla müxtəlif hava təhdidlərini sürətlə aşkar edib izləyə bilir.
ABŞ-ın RTX şirkəti artıq LTAMDS radarlarının istehsalı ilə bağlı ABŞ və Polşa ilə müqavilələr imzalayıb və artan tələbatı qarşılamaq üçün istehsal güclərini genişləndirir.
Bu satış regionda dəyişən təhlükəsizlik şəraiti fonunda hava müdafiə imkanlarının gücləndirilməsi istiqamətində atılan addımlardan biri kimi qiymətləndirilir.
