BAKI,VOA, Nailə Babazadə
ABŞ Prezidenti Donald Tramp Respublikaçılar Partiyasının illik tədbirində çıxış edərək, İran rəhbərliyinin gizli şəkildə danışıqlar apardığını və saziş imzalamağa can atdığını iddia edib. Trampın sözlərinə görə, Tehran rəsmiləri bu istəklərini həm öz xalqından, həm də ABŞ-dan gələn təhlükələr səbəbindən ictimaiyyətə açıqlamaqdan çəkinirlər.
VOA xəbər verir ki, çıxışı zamanı Tramp "müharibə" ifadəsi yerinə "hərbi əməliyyat" terminindən istifadə edəcəyini bildirib. O, baş verənləri "hərbi məhv" adlandıraraq, İranın nüvə silahına sahib olma ehtimalını "xərçəng"ə bənzədib.
"Biz bu xərçəngi kəsib atmalı idik. İndi isə başladığımız işi sona çatdıracağıq." - deyə Tramp qeyd edib.
ABŞ-ın dünyanın ən güclü ordusuna və texnikasına sahib olduğunu vurğulayan Tramp, İranın genişmiqyaslı raket hücumunun uğurla dəf edildiyini irəli sürüb. O, İranın strateji əhəmiyyətli bir hədəfə 100 raket atdığını, lakin saatda 2 min mil sürətlə hərəkət edən həmin raketlərin hamısının havada məhv edilərək dənizə düşdüyünü bəyan edib.
Artan neft və enerji qiymətlərinə də toxunan Tramp, bu bahalaşmanın hərbi əməliyyatın "qısamüddətli" təsiri olduğunu və bu səbəbdən onun üçün xüsusi əhəmiyyət kəsb etmədiyini qeyd edib.
Xatırladaq ki, fevralın 28-də ABŞ və İsrailin İrana qarşı başlatdığı hücumlar nəticəsində İranın ali rəhbəri Əli Xameneyi də daxil olmaqla, bir çox yüksək rütbəli rəsmi həyatını itirib.
