BAKI,VOA, Nailə Babazadə
ABŞ rəsmilərinə istinadən yayılan məlumatlara görə, Donald Tramp İranda saxlanılan 400 kiloqramdan çox yüksək dərəcədə zənginləşdirilmiş uranın müsadirə edilməsi üçün xüsusi hərbi əməliyyat planlarını dəyərləndirir.
VOA xəbər verir ki, bu əməliyyatın olduqca mürəkkəb və riskli olduğu, ABŞ hərbçilərinin günlərlə İran ərazisində qalmasını tələb edə biləcəyi vurğulanır.
Trampın müşavirləri vasitəsilə İrana "müharibənin dayandırılması müqabilində uranın təhvil verilməsi" şərtini qoyduğu iddia edilir. Tehran bu təklifi rədd edərsə, nüvə materialının güc tətbiq etməklə ələ keçirilməsi variantı aktivləşəcək. Bu məqsədlə dəniz piyadaları və paraşütçü desant bölmələrinin bölgəyə yerləşdirilməsi kimi alternativlər hazırlanır.
ABŞ Müdafiə Nazirliyi (Pentaqon) Prezidentə daha geniş seçim imkanı yaratmaq üçün bölgəyə əlavə 10 min quru qoşunu yerləşdirməyi planlaşdırır. Keçmiş CENTCOM komandanı Cozef Votel bildirib ki, bu, qısamüddətli tapşırıq deyil; ərazidə təhlükəsizliyin təmini, dağıntıların təmizlənməsi və nüvə materialının xüsusi qruplar tərəfindən daşınması günlərlə vaxt apara bilər.
Mütəxəssislərin rəyinə görə, İranın əlində olan 400 kiloqramlıq 60% zənginləşdirilmiş uran və 200 kiloqramlıq digər fissil materiallar qısa müddətdə 90%-lik silah dərəcəsinə çatdırıla bilər. ABŞ Dövlət Katibi Marko Rubio hədəflərə quru əməliyyatı olmadan çatmağın mümkünlüyünü qeyd etsə də, Müdafiə naziri Pit Heqset hərbi variantların hər an masada olduğunu xatırladıb.
