BAKI,VOA Nailə Babazadə
İspaniya hökuməti İsrail qüvvələrinin beynəlxalq sularda Qəzzaya humanitar yardım aparan və göyərtəsində İspaniya vətəndaşlarının olduğu gəmini ələ keçirməsini kəskin şəkildə pisləyib.
VOA xəbər verir ki, İspaniya Xarici İşlər Nazirliyindən verilən rəsmi açıqlamaya görə, "Global Sumud" flotiliyasının saxlanılmasına etiraz olaraq İsrailin Madriddəki müvəqqəti işlər vəkili nazirliyə çağırılıb. Nazirlik rəsmiləri İspaniya diplomatik heyətinin gəmi təşkilatçıları ilə daim təmasda olduğunu bildirib. Eyni zamanda Xarici işlər naziri Xose Manuel Albares göyərtəsində vətəndaşları olan digər ölkələrin nazirləri ilə məsələni müzakirə edib.
Qəzzaya tətbiq olunan blokadanı yarmaq məqsədilə yola düşən və fələstinli tərəfdarı olan fəallardan ibarət flotiliya son həftələrdə Marsel (Fransa), Barselona (İspaniya) və Sirakuza (İtaliya) limanlarından hərəkətə başlamışdı. Təşkilatçılar Krit sahillərində İsrail hərbi gəmiləri tərəfindən mühasirəyə alındıqlarını bəyan ediblər.
2023-cü ilin oktyabrında başlayan Qəzza müharibəsindən bəri İspaniya və İsrail arasındakı münasibətlər ən aşağı səviyyəyə enib. İspaniya Baş naziri Pedro Sançesin İsrailin hərbi əməliyyatlarını və ABŞ-İsrailin İranla müharibə planlarını tənqid etməsi tərəflər arasındakı gərginliyi artırıb. Cari ayın əvvəlində İsrailin Baş naziri Benyamin Netanyahu Madrdi İsrailə qarşı diplomatik kampaniya aparmaqda ittiham edərək, onu Qəzzanın müharibədən sonrakı bərpası üzrə ABŞ-ın rəhbərlik etdiyi mərkəzdən kənarlaşdırıb. Xatırladaq ki, hər iki ölkə artıq öz səfirlərini geri çağırıb.
