BAKI,VOA,Yusif Şərifzadə

Beynəlxalq Dəniz Təşkilatının baş katibi Arsenio Dominges bildirib ki, Hörmüz boğazından keçid üçün məcburi ödənişlərin tətbiqi və ya beynəlxalq sularda sərbəst gəmiçiliyi məhdudlaşdıran hər hansı sistem beynəlxalq hüquqa zidd hesab olunur.

VOA xəbər verir ki, Arsenio Dominges bunun əvəzinə Hörmüz boğazında təhlükəsizlik tədbirlərinin maliyyələşdirilməsi üçün könüllü töhfələr əsasında formalaşdırılan fondun yaradılmasını təklif edib.

Onun sözlərinə görə, bu məsələ ilə bağlı Oman rəsmiləri ilə danışıqlar aparılıb və Malakka və Sinqapur boğazlarında tətbiq olunan mövcud model müzakirə edilib.

Məlumata əsasən, İndoneziya, Malayziya və Sinqapur arasında 2007-ci ildən fəaliyyət göstərən mexanizm istifadəçi dövlətlərin və gəmiçilik şirkətlərinin könüllü maliyyə töhfələri hesabına maliyyələşdirilir. Bu vəsaitlər dəniz naviqasiyasının təhlükəsizliyi və ətraf mühitin qorunmasına yönəldilir.

Arsenio Dominges bildirib ki, məqsəd artıq sınaqdan çıxmış uğurlu təcrübədən yararlanaraq regional qarşıdurmanın yaratdığı böhran üçün praktik həll yolları tapmaqdır.

O əlavə edib ki, yaxın vaxtlarda müxtəlif təkliflər Beynəlxalq Dəniz Təşkilatına üzv dövlətlərə təqdim ediləcək və onların tətbiq imkanları qiymətləndiriləcək.