BAKI,VOA, Fərid Mikayılov
ABŞ Prezidenti Donald Trampın müdaxiləsindən sonra FIFA ABŞ millisinin hücumçusu Folarin Baloqunun avtomatik diskvalifikasiyasının icrasını dayandıraraq onun Belçikaya qarşı dünya çempionatının 1/8 final oyununda iştirakına icazə verib.
VOA xəbər verir ki, Bosniya və Herseqovinaya qarşı keçirilən və ABŞ-ın 2:0 hesablı qələbəsi ilə başa çatan oyunda rəqib futbolçuya qarşı kobud oyuna görə qırmızı vərəqə alan Baloqun VAR baxışından sonra meydandan kənarlaşdırılmışdı.
Donald Tramp FIFA prezidenti Canni İnfantino ilə telefon danışığında qərarın yenidən nəzərdən keçirilməsini xahiş edib.
FIFA açıqlamasında bildirib ki, İntizam Məcəlləsinin 27-ci maddəsinə uyğun olaraq futbolçunun bir oyunluq cəzasının icrası bir il müddətinə şərti olaraq dayandırılıb. Qeyd olunub ki, Baloqun bu müddət ərzində oxşar xarakterli yeni intizam pozuntusu törədərsə, təxirə salınmış cəza dərhal qüvvəyə minəcək.
Donald Tramp qərardan sonra Truth Social platformasında paylaşım edərək FIFA-ya təşəkkür edib və bunu "böyük ədalətsizliyin aradan qaldırılması" kimi qiymətləndirib.
ABŞ millisinin baş məşqçisi Maurisio Poçettino isə futbolçunun qırmızı vərəqə ilə cəzalandırılmasının əvvəldən yanlış qərar olduğunu bildirib və FIFA-nın addımını dəstəkləyib.
Buna baxmayaraq, Belçika Kral Futbol Assosiasiyası qərara etiraz edib. Qurum FIFA-nın qərarının turnirin intizam qaydaları ilə ziddiyyət təşkil etdiyini bildirərək bütün hüquqi imkanları araşdırdığını açıqlayıb.
İngiltərə millisinin baş məşqçisi Tomas Tuxel isə Baloqunun qırmızı vərəqəyə layiq olmadığını desə də, artıq qəbul edilmiş qərarın sonradan dəyişdirilməsinin hüquqi əsaslarını sual altına alıb.
Beləliklə, ABŞ və Belçika arasında keçiriləcək 1/8 final qarşılaşması turnirin ən çox müzakirə olunan qərarlarından birinin kölgəsində baş tutacaq.
