BAKI,VOA,Yusif Şərifzadə

Avropa Aviasiya Təhlükəsizliyi Agentliyi Körfəz regionunda artan hərbi gərginlik səbəbindən aviaşirkətlərə bir sıra ölkələrin hava məkanından istifadə etməmək barədə xəbərdarlıq edib.

VOA xəbər verir ki, Avropa Aviasiya Təhlükəsizliyi Agentliyi aviaşirkətlərə Bəhreyn, Küveyt, Qətər, Birləşmiş Ərəb Əmirlikləri və Oman körfəzi yaxınlığındakı hava məkanlarında uçuşlar həyata keçirməməyi tövsiyə edib.

Agentliyin açıqlamasında bildirilib ki, gözlənilməz hərbi hadisələr, həmçinin raketlərdən, pilotsuz uçuş aparatlarından, döyüş təyyarələrindən və hava hücumundan müdafiə sistemlərindən istifadə ehtimalı həmin hava məkanlarında mülki aviasiya üçün yüksək risk yaradır.

Qurum qeyd edib ki, təhlükə bütün yüksəkliklərdə və uçuş səviyyələrində mövcud ola bilər.

Avropa Aviasiya Təhlükəsizliyi Agentliyi daha əvvəl də aviaşirkətlərə İran, İraq və Livanın hava məkanlarından istifadə etməmək barədə tövsiyələr verib.

Məhdudiyyətlər ABŞ və İran arasında davam edən qarşıdurma, eləcə də Körfəz regionunda artan hərbi fəallıq fonunda tətbiq edilir.

Ekspertlər bildirirlər ki, hava məkanında yaranan təhlükəsizlik narahatlıqları beynəlxalq aviasiya marşrutlarında dəyişikliklərə və uçuşların gecikməsinə səbəb ola bilər.