İslam Əməkdaşlıq Təşkilatına (İƏT) üzv 57 dövlətin xarici işlər nazirləri cümə axşamı Mavritaniya diplomatı İsmail Vələd Şeyx Əhmədi təşkilatın yeni baş katibi seçiblər. Xarici İşlər Nazirləri Şurası qarşısındakı ilk çıxışında Vələd Şeyx Əhməd bildirib: "Bugünkü seçiminiz mənim peşəkar karyeramdakı ən böyük vəzifə və beynəlxalq, regional və milli xidmətdə keçirdiyim 3 onillikdən artıq dövrdən sonra qazandığım ən yüksək mükafatdır".
Vələd Şeyx Əhməd bu vəzifədə 2021-ci ilin noyabrında baş katib vəzifəsinin icrasına başlayan və səlahiyyət müddəti rəsmi olaraq 2026-cı ilin noyabrında başa çatan Çad nümayəndəsi Hüseyn İbrahim Tahanı əvəz edir.
Mavritaniyalı diplomat təşkilatın Baş Katibliyinin yerləşdiyi Ciddə şəhərinə BMT çərçivəsində və böhran ocaqlarında keçirdiyi 30 ildən artıq zəngin təcrübə ilə gəlir.
Təşkilatın nizamnaməsinə əsasən, baş katibin səlahiyyət müddəti yalnız bir dəfə yenilənmək şərtilə 5 ildir; o, səriştə, dürüstlük və təcrübə nəzərə alınmaqla, ədalətli coğrafi bölgü, rotasiya və bərabər imkanlar prinsiplərinə uyğun olaraq üzv dövlətlərin xarici işlər nazirləri şurası tərəfindən seçilir.
Nizamnamə vəzifənin ərəb, Afrika və Asiya qrupları arasında keçidi üçün sabit bir ardıcıllıq nəzərdə tutmur, əksinə rotasiya və ədalətli coğrafi bölgünü seçimin əsası kimi müəyyən edir.
Ötən ilin fevral ayında Afrika İttifaqı Mavritaniyanı Şimali Afrika regionuna daxil edərək Vələd Şeyx Əhmədin 2027–2032-ci illər üzrə namizədliyini rəsmən təsdiqləmişdi.
Qeyd edək ki, "İslam Əməkdaşlığı" nizamnaməsi baş katibin rolunu yalnız diplomatik təmsilçiliklə məhdudlaşdırmır; ona İslam sammitlərinin və xarici işlər nazirləri şuralarının qərarlarının icrasını izləmək, təşkilatın orqanlarının fəaliyyətini əlaqələndirmək, eləcə də onun məqsədlərinə xidmət edə biləcək və ya onlara mane ola biləcək məsələləri qaldırmaq vəzifəsi həvalə olunur.
