BAKI, AzerVoice
İsrailin Qəzzaya humanitar yardım aparan “Madleen” gəmisinə müdaxiləsindən sonra əsir götürdüyü yardım könüllüləri deportasiya edilmək üçün Ben Qurion Hava Limanına gətirilib.
AzerVoice xəbər verir ki, İsrail Xarici İşlər Nazirliyinin sosial media hesabında verilən açıqlamada, “Madleen” gəmisinin sərnişinlərinin deportasiya olunmaq üçün Ben Qurion Hava Limanına çatdığı bildirilib.
Açıqlamada qeyd olunub ki, bəzi sərnişinlərin yaxın saatlarda İsraildən ayrılması gözlənilir. Sərhəddən çıxarılma sənədlərini imzalamaqdan və İsraili tərk etməkdən imtina edən şəxslərin isə məhkəməyə çıxarılacağı vurğulanıb.
Qeyd edək ki, “Azadlıq Donanması Koalisiyası (Freedom Flotilla Coalition)” adlı vətəndaş cəmiyyəti təşkilatının Qəzzaya tətbiq olunan blokadanı yararaq bölgəyə yardım çatdırmaq məqsədilə həyata keçirdiyi son missiya çərçivəsində 18 metrlik gəmi 1 iyun tarixində İtaliyanın Kataniya şəhərindəki San Covanni Li Kuti Limanından Qəzzaya doğru yola çıxmışdı.
“Madleen” gəmisindəki aktivistlər, İsrail ordusunun müdaxiləsi halında sülhsevər mövqe tutacaqlarını və müqavimət göstərməyəcəklərini əvvəlcədən bəyan etmişdilər.
İsrail ordusu Qəzzaya tətbiq olunan blokadanı pozmaq məqsədi daşıyan “Madleen” gəmisinə müdaxilə etmişdi.
Gəmidə Avropa Parlamentinin fransız üzvü Rima Hassan və Almaniya vətəndaşı Yasemin Acarla yanaşı, Türkiyədən Hüseyn Şüayb Ordu, Braziliyadan Tiago Avila, İspaniyadan Serxio Toribio, Niderlanddan Marko van Rennes, Fransadan Baptist Andre, Reva Viard, Paskal Muriéras və Yanis Mhamdi, İsveçli iqlim fəalı Qreta Tunberq və jurnalist Omar Faiad daxil olmaqla 12 nəfər olub.
