BAKI,VOA Orxan Qədirzadə

Qəzza zolağında 2023-cü ildə İsrailin hava zərbələri nəticəsində həlak olan Əbu Şəriə və Əl-Həsayinə ailələrinin 112 üzvünün nəşi dağıntılar altından çıxarılaraq iki il yarımdan sonra kütləvi şəkildə dəfn edilib. Mərasim Qəzzada müharibənin başlanmasından bəri keçirilən ən böyük cənazələrdən biri kimi qiymətləndirilir.

Məlumata görə, söhbət 2023-cü il noyabrın 22-də Qəzza şəhərinin əs-Sabra məhəlləsində baş vermiş hücum zamanı həlak olan şəxslərdən gedir. Fələstin mənbələrinin bildirdiyinə əsasən, həmin hücum nəticəsində Əbu Şəriə və Əl-Həsayinə ailələrinin ümumilikdə 308 üzvü həyatını itirib. Onların arasında 40 uşaq, 30 qadın və 7 əlilliyi olan şəxs də olub.

Xilasetmə qrupları son günlər dağıntılar altından 112 nəfərin qalıqlarını çıxarmağa nail olub. Bununla belə, onlarla şəxsin taleyi hələ də naməlum olaraq qalır. Məlumatlara görə, təxminən 157 nəfər ya dağıntılar altında itkin düşmüş hesab edilir, ya da onların aqibəti hələ müəyyənləşdirilməyib.

Dəfn mərasimi zamanı şəhidlərin fotolarının əks olunduğu böyük lövhələr nümayiş etdirilib, həmçinin Qəzzada müharibənin dayandırılması və humanitar vəziyyətin yaxşılaşdırılması ilə bağlı çağırışlar səsləndirilib.

Qəzzanın Mülki Müdafiə Xidmətinin sözçüsü Mahmud Bəsəl mərasimi "Qəzzanın şahid olduğu ən ağrılı və misilsiz səhnələrdən biri" adlandırıb. Onun sözlərinə görə, 100-dən çox insanın eyni vaxtda dəfn olunması son onilliklərdə Fələstin tarixinin ən böyük cənazə mərasimlərindən biri hesab olunur.

Fələstin Milli Təşəbbüsünün baş katibi Mustafa Bərğuti isə bu mərasimin "Fələstin tarixinin ən böyük cənazəsi" ola biləcəyini bildirib. O qeyd edib ki, nəşlər iki ildən artıq müddətdə dağıntılar altında qaldıqdan sonra tapılıb.

Ekspertlər və hüquq müdafiəçiləri bildirirlər ki, bu hadisə Qəzzada müharibənin humanitar nəticələrinin miqyasını bir daha nümayiş etdirir. Onların sözlərinə görə, minlərlə ailə hələ də yaxınlarının taleyi barədə məlumat gözləyir, çoxsaylı nəşlər isə dağıntılar altında qalmaqda davam edir.

Bu hadisə İsrail ilə HƏMAS arasında qüvvədə olan atəşkəs razılaşmasının tez-tez pozulduğu bir dövrə təsadüf edir. Fələstin tərəfinin məlumatına görə, atəşkəsin qüvvəyə minməsindən sonra da çoxsaylı insan həlak olub və yaralanıb.

Qeyd edək ki, müharibə nəticəsində Qəzza zolağında yaşayış məntəqələri və infrastrukturun böyük hissəsi dağılıb. Fələstinli ailə birlikləri beynəlxalq ictimaiyyəti dağıntıların təmizlənməsi, itkin düşənlərin axtarışı və Qəzzanın bərpası istiqamətində təxirəsalınmaz addımlar atmağa çağırıblar.