Bakı, AzerVoice:
Bu il fevralın 7-nə təyin edilmiş Prezident seçkilərində Amerika Birləşmiş Ştatlarında (ABŞ) yaşayan vətəndaşlarımızın seçki hüququnun təmin edilməsi məqsədilə Azərbaycan Respublikasının bu ölkədəki səfirliyi tərəfindən mütəmadi olaraq müvafiq tədbirlər görülür.
AzerVoice xəbər verir ki, bu barədə secki-2024.az saytının sorğusuna cavab olaraq səfirlikdən bildirilib.
Qeyd edilib ki, fevralın 7-də keçiriləcək Azərbaycan Respublikası Prezidenti seçkilərində Amerika Birləşmiş Ştatlarında yaşayan vətəndaşlarımızın seçki hüququnun təmin edilməsi məqsədilə Seçki Məcəlləsinin 36-cı maddəsinə uyğun olaraq ABŞ-dəki səfirlikdə seçki məntəqəsi yaradılıb, Məntəqə Seçki Komissiyasının üzvləri, katibləri və sədri seçilib.
Yeddi fevral seçkilərində ölkə hüdudlarından kənarda daimi yaşayan, yaxud uzunmüddətli xarici ezamiyyətdə olan 18 yaşına çatmış vətəndaşlarımızın seçki hüququnun təmin edilməsi məqsədilə qeydiyyata alınaraq səfirlik tərəfindən seçici siyahıları hazırlanıb və Mərkəzi Seçki Komissiyasına təqdim edilib.
Qanunvericiliyə uyğun olaraq Amerika Birləşmiş Ştatlarında Azərbaycan Respublikası Prezidenti seçkiləri bu il fevralın 7-də yerli vaxtla saat 08:00-19:00-da keçiriləcək.
Azərbaycan Respublikasının Amerika Birləşmiş Ştatlarındakı Səfirliyi vətəndaşlarımızı prezident seçkilərində fəal şəkildə iştiraka və seçki hüquqlarından istifadə etməyə dəvət edir.
