İraq Kürdüstan Regionunun prezidenti Neçirvan Bərzani və Milli Hikmət Hərəkatının lideri Əmmar əl-Həkim Ərbil ilə Bağdad arasında münasibətlərin inkişaf etdirilməsinin vacibliyini vurğulayıblar.
ArabAZ xəbər verir ki,tərəflər bazar ertəsi keçirilən görüşdə İraqdakı siyasi vəziyyəti, ölkənin gələcəyi ilə bağlı prosesləri və Ərbil-Bağdad münasibətlərini müzakirə ediblər.
Bərzani və əl-Həkim İraqın siyasi sabitliyinin və milli birliyin qorunmasının vacibliyini qeyd edərək, ölkənin müxtəlif siyasi və ictimai qüvvələri arasında dialoqun davam etdirilməsinin əhəmiyyətini vurğulayıblar.
Görüşdə həmçinin Ərbil və Bağdad arasında mövcud məsələlərin qarşılıqlı anlaşma və konstitusiya çərçivəsində həllinin, iki tərəf arasında koordinasiya və əməkdaşlığın gücləndirilməsinin vacibliyi qeyd olunub.
Tərəflər İraqda siyasi prosesin inkişafı və ölkənin qarşıdakı mərhələdə üzləşdiyi çağırışlarla bağlı fikir mübadiləsi aparıblar.
