BAKI,VOA, Fərid Mikayılov
Qətərin Baş naziri və xarici işlər naziri Şeyx Məhəmməd bin Əbdürrəhman bin Casim Al Tani bu gün Tehrana səfər edəcək. Səfərin əsas məqsədi regionda gərginliyin azaldılması və ABŞ ilə İran arasında dialoqun yenidən başlanmasına şərait yaradılmasıdır.
VOA xəbər verir ki, Qətər Baş naziri Tehranda bir sıra yüksək vəzifəli İran rəsmiləri ilə görüşəcək. Danışıqlarda Qətərin vasitəçilik səylərinin davam etdirilməsi və regiondakı son proseslərin müzakirəsi nəzərdə tutulur.
Qətər tərəfi hesab edir ki, mövcud fikir ayrılıqlarının aradan qaldırılması, eləcə də regionda təhlükəsizlik və sabitliyin təmin edilməsi üçün diplomatik yol əsas vasitə olmalıdır.
Doha son dövrdə Vaşinqton və Tehran arasında danışıqların bərpası istiqamətində fəal vasitəçilik aparır. Qətər Xarici İşlər Nazirliyi daha əvvəl Oman və Pakistanla birlikdə İran və ABŞ arasında fikir ayrılıqlarının azaldılması və davamlı razılaşmanın əldə olunması istiqamətində səylərin davam etdirildiyini açıqlamışdı.
Səfər zamanı Hörmüz boğazında gəmiçiliyin təhlükəsizliyi və sərbəst hərəkətin bərpası məsələsinin də müzakirə ediləcəyi bildirilir.
Qətər bundan əvvəl də ABŞ və İran arasında vasitəçi rolunda çıxış edib. Doha iyunda tərəflər arasında əldə edilən anlaşmanın formalaşmasına yardım göstərib. Lakin sonrakı dövrdə diplomatik proses yenidən dalana dirənib.
Hazırkı səfər Vaşinqtonun Tehrana qarşı iqtisadi təzyiqi gücləndirdiyi və Hörmüz boğazı ətrafındakı vəziyyətin regional təhlükəsizlik üçün əsas məsələlərdən birinə çevrildiyi dövrə təsadüf edir.
