BAKI, AzerVoice
Qırğızıstan Prezidenti yanında Milli İnvestisiya Agentliyi ilə Çin mənşəli Binance şirkətinin rəhbəri Çanpen Çjao arasında əməkdaşlıq memorandumu imzalanıb.
AzerVoice xəbər verir ki, tərəflər aşağıdakı təşəbbüslər üzrə əməkdaşlıq etməyə razılaşıblar:
- İnfrastruktur və texnoloji dəstək: Qırğızıstanda blokçeyn infrastrukturunun inkişafına töhfə vermək üçün məsləhət və texnoloji həllər təqdim etmək, həmçinin kriptovalyutaların planlaşdırılan ehtiyatlarının formalaşmasına dəstək göstərmək;
- Gənclərin blokçeyn texnologiyaları üzrə təhsil almasına və inkişafına kömək etmək: Müvafiq nazirlik və qurumların əməkdaşları üçün blokçeyn texnologiyaları, virtual aktivlərin idarə edilməsi və kibertəhlükəsizlik mövzusunda tədris proqramlarının həyata keçirilməsi;
- Virtual aktivlərin və blokçeyn texnologiyalarının inkişafı üçün idarəetmə sisteminin qurulması.
Binance-in rəhbəri Çanpen Çjao blokçeyn texnologiyaları və kriptovalyuta həlləri sahəsində ixtisaslaşmış dünyanın ən böyük kriptovalyuta birjasının qurucusudur. O, e-cüzdanların inkişafı, blokçeyn infrastrukturu, qanunvericilik bazası və konsaltinq xidmətləri üzrə geniş təcrübəyə malikdir.
Qırğızıstan Prezidenti Sadır Japarov bu təşəbbüsü şəxsən dəstəkləyərək rəsmi olaraq yeni X hesabını açıb. Binance rəhbəri isə Japarovun platformaya qoşulmasını xüsusi qeyd edərək ona dəstəyini ifadə edib.
