BAKI,VOA, Fərid Mikayılov

Qırğızıstan Prezidenti Sadır Japarov Çolpon-Ata şəhərində Türk Dövlətləri Təşkilatının (TDT) Baş katibi Kubanıçbek Ömüralıyevi qəbul edib.

VOA xəbər verir ki, dövlət başçısı təşkilata üzv ölkələr arasında qarşılıqlı əlaqələrin ardıcıl şəkildə inkişaf etdiyini məmnunluqla qeyd edərək, bundan əvvəl əldə olunmuş razılaşmaların vaxtında və keyfiyyətlə icra edilməsinin xüsusi əhəmiyyət daşıdığını diqqətə çatdırıb.

Japarov iqtisadi əməkdaşlığın daha da dərinləşdirilməsinin, nəqliyyat və digər infrastruktur sahələrinin inkişaf etdirilməsinin, həmçinin birgə investisiya layihələrinin reallaşdırılmasının vacibliyini vurğulayıb.

Bu kontekstdə o, üzv dövlətlərin prioritet təşəbbüslərinin təşviqində səmərəli mexanizm kimi Türk İnvestisiya Fondunun xüsusi rolunu qeyd edib və Qırğızıstan tərəfinin bu fondun imkanlarından fəal istifadə etməkdə maraqlı olduğunu bildirib.

Japarov həmçinin təşkilatın bundan sonra da mədəni-humanitar və sosial-iqtisadi sahələrdə işbirliyinin genişləndirilməsinə prioritet yön kimi diqqət ayırmalı olduğunu vurğulayıb. Görüş əsnasında TDT çərçivəsində əməkdaşlığın gələcək inkişafı və təşkilatın prioritet fəaliyyət istiqamətləri üzrə fikir mübadiləsi aparılıb.