BAKI, AzerVoice
Səudiyyə Ərəbistanı İsrailin Fələstin torpaqlarında eskalasiyasını, mülki şəxslərin və onların sığındığı bölgələrin hədəf alınmasını, onlarla insanın öldürülməsini, o cümlədən Qəzza zolağında məcburi köçkünləri sığınacaqla təmin edən Dar əl-Ərqəm məktəbinin bombalanmasını sərt şəkildə pisləyib.
AzerVoice xəbər verir ki, bu barədə Səudiyyə Ərəbistanının Xarici İşlər Nazirliyi bəyanat yayıb.
Bəyanatda həmçinin İsrail ordusunun Rəfah şəhərində yerləşən Səudiyyə Mədəniyyət və İrs Mərkəzinə məxsus anbarı məhv etməsi də sərt şəkildə pislənilib. Həmin anbarda Qəzzadakı xəstə və yaralıların ehtiyaclarını qarşılamaq üçün nəzərdə tutulan tibbi ləvazimatlar saxlanılırdı.
Nazirlik vurğulayıb ki, beynəlxalq aləmdə İsrailin zorakılığına qarşı təsirli və sərt hesabat mexanizmlərinin olmaması İsrail qüvvələrinin hüquq pozuntularını daha da artırır, həm regional, həm də beynəlxalq təhlükəsizlik və sabitlik üçün ciddi təhlükə yaradır.
Səudiyyə Ərəbistanı BMT Təhlükəsizlik Şurasının üzv dövlətlərinin Fələstin xalqının yaşadığı bu faciəyə son qoymaq üçün öz məsuliyyətlərini yerinə yetirmələrinin vacibliyini bir daha vurğulayıb.
Digər tərəfdən, Dünya İslam Liqası da verdiyi bəyanatda İsrailin mülki şəxslərə və infrastruktur obyektlərinə qarşı cinayətlərini qətiyyətlə pisləyib. Liqanın baş katibi və Müsəlman Alimlər Heyətinin rəhbəri Dr. Məhəmməd əl-İsa beynəlxalq ictimaiyyətin bu hüquq pozuntularına qarşı məsuliyyət daşıdığını və bu pozuntuları dayandırmaq, cinayətkarları cəzalandırmaq üçün beynəlxalq mexanizmləri işə salmasının vacibliyini qeyd edib.
Bununla yanaşı, İslam Əməkdaşlıq Təşkilatı (İƏT) da İsrail işğal qüvvələrinin mülki şəxsləri, məcburi köçkünlərin sığınacaq yerlərini, təhsil və səhiyyə müəssisələrini məqsədyönlü şəkildə hədəfə almasını sərt şəkildə qınayıb. Təşkilat bunu beynəlxalq hüququn, beynəlxalq humanitar hüququn və əlaqədar BMT qərarlarının açıq şəkildə pozulması kimi qiymətləndirib. Təşkilat BMT Təhlükəsizlik Şurasını BMT Nizamnaməsinin 7-ci fəslinə uyğun şəkildə hərəkətə keçərək atəşkəsi təmin etməyə, Qəzza zolağına humanitar yardımın daxil olmasına zəmanət verməyə və beynəlxalq cinayət hüququna uyğun olaraq İsrailin bütün cinayətlərinə görə məsuliyyət daşımasını təmin etməyə çağırıb.
