Səudiyyə Ərəbistanının İctimai İnvestisiya Fondu (PIF) yetkinləşən portfel şirkətlərinin dəstəyi ilə 2025-ci il üzrə gəlirlərinin 9 faiz artaraq 120 milyard dollara, xalis mənfəətinin isə iki dəfədən çox çoxalaraq 17 milyard dollara çatdığını açıqlayıb.
Fondun idarəetməsində olan aktivlərin ümumi həcmi 900 milyard dolları ötüb və bu göstərici ilə o, dünyanın beşinci ən böyük suveren fondu mövqeyini qoruyub. Aktivlərinin 80 faizini ölkə daxilinə yönəldən fond 2025-ci ildə Səudiyyə Ərəbistanının qeyri-neft ÜDM-nin 11 faizini təmin edib.
Qurum eyni zamanda beynəlxalq fəaliyyətini genişləndirərək Paris, Pekin və Şanxayda yeni ofislər açıb, "Goldman Sachs" və "Macquarie" kimi nəhənglərlə strateji tərəfdaşlıqlar qurub.
Daxili iqtisadiyyatın şaxələndirilməsi çərçivəsində isə süni intellekt sahəsində "Humain" şirkəti və "Expo 2030" infrastrukturunu idarə edəcək yeni qurumlar təsis edilib.
