Mədinə qubernatoru şahzadə Salman bin Sultan bin Əbdüləziz Səudiyyə Ərəbistanının müsəlmanların qibləsi və İslamın doğulduğu məkan kimi xüsusi dini mövqeyini vurğulayıb.
ArabAZ xəbər verir ki,Şahzadə Salman bu fikirləri Mədinədə İslam Araşdırmaları və Fətva üzrə Baş İdarənin yerli bölməsinin alimlərlə keçirdiyi görüşdə səsləndirib. O bildirib ki, Səudiyyə Ərəbistanı dünyada etibarlı dini mərkəzlərdən biri kimi mühüm rol oynayır.
Qubernator Səudiyyə alimlərinin verdiyi fətvaların Qurani-Kərim və Peyğəmbərin sünnəsinə əsaslandığını qeyd edib. Onun sözlərinə görə, fətvaların hazırlanmasında müsəlmanlar arasında birliyi təşviq edən mötədil və balanslı yanaşma əsas götürülür.
Şahzadə Salman Mədinədəki qurumun dini əhəmiyyətinə xüsusi diqqət çəkərək, onun şəriət hökmlərinin izahı və fətva ilə bağlı müraciətlərə cavab verilməsi baxımından mühüm məsuliyyət daşıdığını bildirib. O, bu fəaliyyətin ixtisaslaşmış və yüksək hazırlıqlı alimlər tərəfindən həyata keçirilməsinin vacibliyini vurğulayıb.
