BAKI, AzerVoice

Azərbaycan İlahiyyat İnstitutunda “Ailə dəyərlərimizə gənclərin baxışı” mövzusunda geniş tərkibli tədbir keçirilib.

AzerVoice xəbər verir ki, 15 may 2025-ci il tarixində baş tutan tədbirdə dövlət qurumlarının rəhbərləri, millət vəkilləri, elm və təhsil nümayəndələri, eləcə də tələbələr iştirak ediblər.

Tədbirin əvvəlində Aİİ nəzdində fəaliyyət göstərən “İslam incəsənəti” dərnəyi tərəfindən hazırlanan “Ailə dəyərləri İslam incəsənətinin gözü ilə” adlı sərgi nümayiş olunub.

Ardınca Açıq dərs formatında davam edən tədbirdə tələbələr “İslamda ailə dəyərləri”, “İslamda uşaq tərbiyəsi”, “Ailə institutunun ictimai əhəmiyyəti” və “Erkən nikahın qarşısının alınmasında təhsilin rolu” mövzularında çıxışlar ediblər.

Sonda “Ailə dəyərlərimizə gənclərin baxışı” mövzusunda keçirilən esse müsabiqəsinin qalibləri və iştirakçıları, həmçinin sərginin hazırlanmasında və təqdimatlarda iştirak edən tələbələr müxtəlif nominasiyalar üzrə təltif olunublar.

Qeyd edək ki, tədbirdə Dini Qurumlarla İş üzrə Dövlət Komitəsinin sədri Ramin Məmmədov, Ailə, Qadın və Uşaq Problemləri üzrə Dövlət Komitəsinin sədri Bahar Muradova, elm və təhsil nazirinin müavini Firudin Qurbanov, gənclər və idman nazirinin müavini İndira Hacıyeva, Milli Məclisin deputatları Fazil Mustafa, Anar İsgəndərov, Sahib Alıyev, Dövlət Komitəsinin sədr müavini Aynur Sofiyeva, QHT-lərə Dövlət Dəstəyi Agentliyinin icraçı direktoru Aygün Əliyeva və digər rəsmi şəxslər iştirak ediblər.