BAKI,AzerVoice
Əgər narkotikdən asılı olmuş şəxsin maddi vəziyyəti yaxşı deyilsə, o heç cür əvvəlki sağlam həyatına qayıda bilməz.
Bu fikirləri AzerVoice-ə açıqlamasında Regional Sosial Təşəbbüslərə Dəstək İctimai Birliyinin Sədri Emil Maqalov bildirib.
O, bildirib ki, narkotikdən asılı olan insanların müalicəsi üçün dövlətin narkodispanserləri olsada, narkodispanserlər, şəxsi fiziki asılılığdan qurtarır.
"Fiziki asılılıqdan 15-20 gün ərzində çıxmaq olur. Lakin bununlar iş bitmir, çünki fiziki asılılıqdan çıxmış şəxslərin 70 faizindən çoxu bu zərərli vərdişə geri qayıdır. Çünki həmin şəxslər reabilitasiya olunmur"- deyə ekspert bildirib.
Ekspert, hazırda narkodispanserlərin tərkibində reabilitasiya mərkəzinin olduğunu, lakin həmin mərkəzlərin fəaliyyətsiz olduğunu qeyd edib.
"Effektiv reabilitasiya üçün minimum 5-6 ay vaxt tələb olunur. Dünyada geniş tətbiq olunan və 1934-cü ildən bəri istifadə edilən ‘12 addım’ proqramı nəticəsində narkotikdən uzaqlaşanların uğur faizi 80-ə qədər yüksəlir"- deyə narkomaniya üzrə ekspert Maqalov bildirib.
O, həmçinin bildirib ki, insanların narkotikə başlamasının əsas səbəbi düşdüyü mühitdir.
Ekspertin sözlərinə görə, bəzi məktəblərdə zəif fiziki və ya psixoloji xüsusiyyətlərə malik uşaqlar sinifin dominant şagirdləri tərəfindən sıxışdırılır və bu zaman həmin uşaqlar özlərinə psixoloji dəstək axtarmağa başlayırlar.
“Məsələn, məktəblərdə zəif uşaqları sinifin ‘böyük’ uşaqları sıxışdırırlar və bu zəif xarakterli uşaqlar onlara yaxın olmağa çalışır ki, hər hansı xoşagəlməz hal baş verməsin. Daha sonra o 'böyük uşaqlar' hər hansı yollarla narkotik vasitə əldə edir və istifadə etməyə başlayırlar,” – deyə ekspert bildirib.
Ekspert əlavə edib ki, belə hallarda həmin qrup daxilində narkotik maddədən istifadə bir “normal davranış” kimi qəbul olunur və istifadə etməyən uşaqlara təzyiqlər göstərilir.
"Onların düşüncə tərzinə görə, əgər biri bu maddədən istifadə etmirsə, qrupdan kənar sayılır və ona mənfi münasibət göstərilir. Hal-hazırda danışdığım real hadisədə 7 uşaqdan 4-nə öz resurslarımızla yardım etmişik,” – deyə ekspert vurğulayıb.
Maqalov, bu kimi halların qarşısının alınması üçün məktəblərdə psixoloji dəstək sistemlərinin gücləndirilməsinin və erkən maarifləndirmə tədbirlərinin vacibliyini qeyd edib.
