BAKI, AzerVoice, Zeynəb Raminqızı
"Əlilliyi olan şəxslərə sosial dəstək" İctimai Birliyi, Azərbaycan Respublikasının Dövlət Turizm Agentliyinin maliyyə dəstəyi ilə “Duruca kəndində turizmin inkişafına dəstək” layihəsi çərçivəsində Qəbələ rayonunda yaşayan sosial vəziyyəti ağır olan xanımlara əl işlərinin öyrədilməsi məqsədilə təşkil etdiyi təlimləri uğurla tamamlayıb. Bu təlimlər iştirakçılara yeni bacarıqlar qazandırmaq və onların iqtisadi müstəqilliklərini artırmaq məqsədini güdüb.
Təlim proqramı çərçivəsində iştirakçılara müxtəlif əl işləri, o cümlədən epoksid, muncuq işləri, toxuma və digər sahələr üzrə biliklər və bacarıqlar öyrədilib. Təlimlər mütəxəssis təlimçi tərəfindən aparılıb və iştirakçılar arasında yüksək iştirakçılıq, motivasiya və müsbət ruh yüksəkliyi müşahidə olunub.
Təlimlərin nəticələsi olaraq iştirakçılar öz yaradıcılıq potensialını kəşf edərək, müxtəlif əl işləri hazırlamağı öyrəniblər. Bununla iştirakçılar yeni əldə olunan bacarıqlar vasitəsilə gələcəkdə öz işlərini qurma imkanı qazanmışlar. Eyni zamanda təlimlər xanımların sosial inteqrasiyasına səbəb olmuş, qadınların bir-biri ilə tanış olmalarına və sosial cəmiyyətə daha aktiv şəkildə inteqrasiya etmələrinə yardımçı olub. Bu uğurlu təlimlər, "Əlilliyi olan şəxslərə sosial dəstək" İctimai Birliyinin sosial layihələrinin bir hissəsidir və yerli icmada müsbət dəyişikliklər yaratma məqsədini güdür. Təlimlərin yekununda iştirakçılara sertifikat təqdim olunub.
"Əlilliyi olan şəxslərə sosial dəstək" İctimai Birliyi, bu tip layihələrin həyata keçirilməsinin qazandığı müsbət nəticələrin davam etdirilməsi niyyətindədır. Biz iştirakçıların iqtisadi və sosial rifahını artırmağa yönəlmiş digər proqramlar üzərində işləməyə davam edəcəyik.
