BAKI, AzerVoice

17 sentyabr 2025-ci il tarixində Quba Olimpiya İdman Kompleksində Azərbaycan Respublikasının Gənclər və İdman Nazirliyi, Azərbaycan Respublikasının Gənclər Fondunun dəstəyi və “Gənclərin Maarifləndirilməsinə Dəstək” İctimai Birliyinin təşkilatçılığı ilə “Gənclərin Liderlik Akademiyası – 4” düşərgəsinə start verilib.

Bu barədə AzerVoice-a “Gənclərin Maarifləndirilməsinə Dəstək” İctimai Birliyindən (GMD) məlumat verilib.

İlk olaraq gənclər Ulu Öndər Heydər Əliyevin abidəsini ziyarət ediblər. Gənclər düşərgə ərazisinə çatdıqdan sonra açılış mərasimi baş tutub. Tədbir dövlət himninin səsləndirilməsi ilə başlayıb.

Rəsmi hissədə Quba Rayon İcra Hakimiyyəti başçısının müavini, ictimai-siyasi və humanitar məsələlər şöbəsinin müdiri Səidə Abbasova, Azərbaycan Respublikası Gənclər və İdman Nazirliyinin Gənclərlə iş şöbəsinin müdiri Ramil Cabbarov, Azərbaycan Respublikasının Gənclər Fondunun nümayəndəsi Rüfət Qazızadə iştirakçılara uğurlar arzu edərək, layihənin gənclər üçün əhəmiyyətini vurğulayıblar.

Rəsmi qonaqların çıxışlarındam sonra istedadlı gənclər tərəfindən “Yaşa, Azərbaycan” və “Şən Azərbaycan” mahnıları ifa olunub, “Nazeləmə” və “Qaytağı” rəqsləri isə açılış mərasiminə xüsusi rəng qatıb.

Bu il “Konstitusiya və Suverenlik ili”nə həsr olunan düşərgə gənclərin liderlik bacarıqlarının inkişafına, dövlətçilik dəyərlərinə sadiq, təşəbbüskar və məsuliyyətli vətəndaş kimi formalaşmasına xidmət edir. Tədbir çərçivəsində gənclər müxtəlif təlimlər, interaktiv oyunlar, komanda işləri və görüşlər vasitəsilə həm nəzəri biliklər, həm də praktiki bacarıqlar qazanacaqlar.

Beş gün davam edəcək düşərgə ərzində təcrübəli təlimçilər və vəkillərin iştirakı ilə keçiriləcək sessiyalar gənclərin gələcək fəaliyyətində mühüm rol oynayacaq.