BAKI, AzerVoice

Bu gün Quba 1 saylı Mediasiya Təşkilatının kollektivi, "Vətən Naminə" Şəhid Ailələrinə Dəstək İctimai Birliyinin nümayəndələri və rayonun müxtəlif idarə və təşkilatlarının əməkdaşları Qərbi Azərbaycan İcmasının Quba Nümayəndəliyini ziyarət ediblər.

AzerVoice xəbər verir ki, görüş zamanı nümayəndəliyin fəaliyyəti, icmanın əsas hədəfləri və həyata keçirilən layihələr barədə geniş məlumat təqdim olunub. Tərəflər mümkün əməkdaşlıq istiqamətlərini müzakirə edib, qarşılıqlı əlaqələrin daha da gücləndirilməsi ilə bağlı fikir mübadiləsi aparıblar.

Tədbirdə Qərbi Azərbaycandan deportasiya olunmuş soydaşlarımızın tarixi yaddaşının qorunması, həqiqətlərin gənc nəslə çatdırılması və ictimai birliklərin bu prosesdə əhəmiyyətli rol oynadığı xüsusi vurğulanıb.

Görüşün sonunda qonaqlar səmimi qarşılanmaya görə Qərbi Azərbaycan İcmasının Quba Nümayəndəliyinə təşəkkür edib, gələcək əməkdaşlıqda uğurlar arzulayıblar.