BAKI,AzerVoice
Azərbaycan Qiymətləndiricilər Cəmiyyətinin sədrinin müşaviri Asif İbrahimov qiymətləndirmə sahəsinin uzun müddətdir diqqətdən kənarda qalması ilə bağlı məsələni Mərkəzi Bank rəhbərliyi ilə açıq şəkildə müzakirə etdiklərini bildirib.
AzerVoice xəbər verir ki, bu barədə Azərbaycan Qiymətləndiricilər Cəmiyyəti məlumat yayıb.
Asif İbrahimov Mərkəzi Bankda ölkənin aparıcı ekspertlərinin iştirakı ilə keçirilən ənənəvi görüş zamanı bank və sığorta sektoru ilə yanaşı, qiymətləndirmə sahəsində mövcud olan ciddi problemlərin də gündəmə gətirildiyini qeyd edib.
Onun sözlərinə görə, görüşdə bank və sığorta sektorunda tətbiq edilən yeniliklər, korporativ idarəetmə standartları, pul-kredit və fiskal siyasət, devalvasiya riskləri, eləcə də bank sektorunda rəqabətin artırılması kimi məsələlər müzakirə olunub. Bununla yanaşı, əsas diqqət uzun müddətdir sistemli şəkildə tənzimlənməyən qiymətləndirmə sektoruna yönəlib.
Asif İbrahimov bildirib ki, Mərkəzi Bank rəhbərliyinə ünvanladığı suallarda bank və sığorta sahəsində ardıcıl islahatlar aparıldığı halda, qiymətləndirmə sektoruna eyni yanaşmanın sərgilənməməsi xüsusi vurğulanıb.
“Qiymətləndirmə sahəsi maliyyə sisteminin ayrılmaz hissəsi olsa da, bu sektor uzun illərdir institusional baxımdan kənarda qalır. Bu isə bank sistemi ilə sağlam inteqrasiyaya mane olur”, – deyə o qeyd edib.
