BAKI,AzerVoice
Allah-Təala möminlərə iffətlərini qorumağı əmr etmiş və zinanın hər növündən çəkindirmişdir. Qurani-Kərimdə axirətdə nicat tapacaq möminlərin sifətləri sadalanarkən belə buyurulur:
“O kəslər ki, ayıb yerlərini (zinadan) qoruyurlar. Yalnız zövcələri və sahib olduqları (cariyələri) istisnadır. Onlarla münasibətdə olduqları üçün qınanmazlar. Bundan artığını istəyənlər isə həddi aşanlardır.”
İslam dini insanın əks cinsə meylini fitri bir ehtiyac kimi qəbul edir və bu ehtiyacın yalnız halal yolla – nikah vasitəsilə təmin olunmasına icazə verir. Evliliyin məqsədləri arasında nəsil artırmaq, qohumluq bağları qurmaq və insan nəslinin davamını təmin etmək olduğu kimi, əsas məqsədlərdən biri də insanın təbii şəhvətini halal çərçivədə tətmin etməkdir.
Başqa sözlə, ər-arvad dinin icazə verdiyi halal çərçivədə bir-birindən zövq ala bilərlər. Bunun xaricində şəhvəti doyurmağa yönəlmiş bütün yollar günah sayılır.
Masturbasiya məsələsi
Kişinin və ya qadının şəhvətini əl ilə, yaxud təsəvvür, şəkil, səs və digər vasitələrlə boşalmaqla təmin etməsi (masturbasiya) İslamda məqbul hesab olunmur. Bu cür hallarda insan oruc tutaraq şəhvətini zəiflədə bilər. Peyğəmbərimiz (s.ə.s.) buyurmuşdur:
“Sizdən evlənməyə gücü çatan evlənsin. Çünki bu, gözü haramdan daha çox qoruyar və iffəti qoruyar. Kimin gücü çatmazsa, oruc tutsun. Çünki oruc onun üçün bir sipərdir.”
Bəzi alimlər isə insan zinaya düşmə təhlükəsi ilə üz-üzə qalarsa və başqa mübah çıxış yolu tapa bilməzsə, iki şərdən daha yüngül olanı seçmək məqsədilə masturbasiyaya müvəqqəti icazə verildiyini bildirmişlər.
Süni vasitələr və onların fəsadları
Bəzi insanlar süni cinsi vasitələrdən – süni orqanlardan, manekenlərdən və oxşar məhsullardan istifadəni çıxış yolu kimi görürlər. Bəzi alimlər bunu zinaya düşmə təhlükəsi qarşısında mübah saysalar da, bu vasitələrin:
asılılıq yaratması,evliliyə alternativə çevrilməsi,boşanmalara səbəb olması, psixoloji cəhətdən insanı ailədən və məsuliyyətdən uzaqlaşdırması kimi təhlükələri var.
Ailə daxilində problemlərin həlli
Əgər evli insan cinsi münasibətdə məmnuniyyət tapmırsa, İslamın icazə verdiyi yollarla problemin həllinə çalışmalıdır. Bu, bəzən tibbi yardım, psixoloji dəstək və ya qarşılıqlı ünsiyyət yolu ilə ola bilər. Ər-arvadın açıq danışaraq problemi müzakirə etməsi ən doğru yoldur.
Qeyd edilməlidir ki, ağız (oral) və anal münasibətlər, sperma udmaq kimi əməllər İslamda icazəli deyil. Amma bunun xaricində ər-arvadın bir-birinin ehtiyaclarını müxtəlif yollarla halal çərçivədə təmin etməsi caizdir.
Cinsi münasibətdə ədəb və qaydalar
İslam cinsi münasibəti tənzimləyən müəyyən hökmlər və ədəblər də qoymuşdur. Bunlara: yaxınlıqdan əvvəl təmizlənmək, tərəf-müqabilin istəklərini nəzərə almaq, əvvəlcədən mehribanlıq və ünsiyyət qurmaq,kimi məsələlər daxildir. Bu davranışlar Peyğəmbərimiz (s.ə.s.) və səhabələrdən gələn rəvayətlərdə öz əksini tapmışdır.
