ABŞ məhkəməsi niyə Cənubi Sudan üçün müdafiə statusunun ləğvinə icazə verib?

ABŞ-ın federal hakimi Patti Saris Tramp administrasiyasına Cənubi Sudan vətəndaşları üçün Müvəqqəti Qorunan Statusun (TPS) ləğvinə icazə verib. Qərar Ali Məhkəmənin Haiti və Suriya ilə bağlı analoji qərarından sonra qəbul olunub. TPS proqramı münaqişə və ya təbii fəlakət yaşayan ölkələrin vətəndaşlarına deportasiyadan müvəqqəti müdafiə və işləmək hüququ verir. ABŞ hökuməti isə Cənubi Sudanın artıq bu status üçün şərtlərə cavab vermədiyini bildirir.

7 Avqust 2026 20:34

BAKI,VOA,Yusif Şərifzadə

ABŞ-ın federal məhkəməsi Prezident Donald Tramp administrasiyasına Cənubi Sudan vətəndaşları üçün deportasiyadan müvəqqəti müdafiə statusunu (TPS) ləğv etməyə icazə verib.

VOA xəbər verir ki, Boston şəhərinin federal hakimi Patti Saris immiqrant hüquqlarını müdafiə edən təşkilatların Cənubi Sudan üçün Müvəqqəti Qorunan Statusun (Temporary Protected Status – TPS) qüvvədə saxlanılması ilə bağlı son müraciətini rədd edib.

Qərar ABŞ Ali Məhkəməsinin iyun ayında Tramp administrasiyasına Haiti və Suriyadan olan minlərlə şəxsin analoji müdafiə statusunu ləğv etməyə icazə verməsindən sonra qəbul olunub.

Ali Məhkəmənin 6-3 səs nisbəti ilə qəbul etdiyi qərar aşağı instansiya məhkəmələrinin Daxili Təhlükəsizlik Nazirliyinin (DHS) TPS proqramını ləğv etməsi ilə bağlı qərarlarını nəzərdən keçirmək imkanlarını məhdudlaşdırıb.

TPS proqramı təbii fəlakət, silahlı münaqişə və ya digər fövqəladə hallarla üzləşən ölkələrin vətəndaşlarına ABŞ-da müvəqqəti yaşamaq, işləmək və deportasiyadan qorunmaq hüququ verir.

ABŞ Daxili Təhlükəsizlik Nazirliyi ötən ilin noyabrında Cənubi Sudan üçün TPS statusunun dayandırılması barədə qərar qəbul edərək, ölkənin artıq bu status üçün tələb olunan meyarlara cavab vermədiyini bildirib.

Cənubi Sudan 2011-ci ildən etibarən TPS proqramına daxil edilmişdi.