BAKI,VOA Orxan Qədirzadə
Sudanın Qərbi Darfur bölgəsində təhlükəsizlik vəziyyətinin pisləşməsi və silahlı toqquşmalar nəticəsində 10 kənddən 5 mindən çox insan evlərini tərk edib.
Beynəlxalq Miqrasiya Təşkilatının məlumatına görə, avqustun 8-də Qərbi Darfur əyalətinin Sarba bölgəsində 5 135 nəfər məcburi köçkün vəziyyətinə düşüb. Təşkilat bildirib ki, zərərçəkən ailələrin böyük hissəsi sərhədi keçərək Çada sığınıb.
Yeni köç dalğası avqustun 4-də bölgədə baş verən oxşar hadisədən sonra qeydə alınıb. Bundan əvvəl isə Beynəlxalq Miqrasiya Təşkilatı Sarbada 11 kənddən təxminən 6 600 nəfərin döyüşlər və təhlükəsizlik problemləri səbəbindən evlərini tərk etdiyini açıqlamışdı.
Biyar Sliba uğrunda döyüşlər
Toqquşmalar Qərbi Darfurun əsas yaşayış məntəqələrinə aparan mühüm marşrut üzərində yerləşən Biyar Sliba ərazisində baş verib. Darfur bölgəsinin qubernatoru Mini Arko Minavi Sudan ordusunun “Çevik Dəstək Qüvvələri”nin (RSF) bölgəyə həyata keçirdiyi genişmiqyaslı hücumun qarşısını aldığını bildirib.
RSF Darfurun beş əyalətinin böyük hissəsinə nəzarət edir. Şimali Darfurda isə bəzi ərazilər ordu və onun müttəfiqi olan silahlı qrupların nəzarətindədir. Sudan ordusu ölkənin digər əyalətlərinin böyük hissəsinə nəzarəti saxlayır.
Sudanda humanitar böhran dərinləşir
Sudanda ordu ilə RSF arasında 2023-cü ilin aprelindən davam edən müharibə ölkədə ağır humanitar böhrana səbəb olub. Münaqişə nəticəsində on minlərlə insan həyatını itirib, təxminən 13 milyon nəfər isə ölkə daxilində və xaricində məcburi köçkün vəziyyətinə düşüb.
Darfurda yeni döyüşlərin başlaması isə bölgədə onsuz da ağır olan humanitar vəziyyətin daha da pisləşməsi və yeni qaçqın dalğasının yaranması riskini artırır.
