Bakı, AzerVoice

Suriyada 61 illik Baas rejiminin sona çatmasından sonra, rejim dövründə zorla yoxa çıxan və ya həbs edilən 112 mindən çox insanın taleyi ilə bağlı suallar aktual olaraq qalır.

AzerVoice xəbər verir ki, Suriya İnsan Haqları Şəbəkəsi (SNHR) bu insanların əksəriyyətinin öldürüldüyünə dair ciddi ehtimalların olduğunu bildirib.

Baas rejiminin hakimiyyəti illərində minlərlə insanın zorla yoxa çıxması, işgəncələrə məruz qalması və mühakimə olunmadan edam edilməsi ilə bağlı çoxsaylı sübutlar ortaya çıxıb. Rejim tərəfindən həyata keçirilən bu siyasət, Suriya həbsxanalarını insan hüquqları pozuntularının simvoluna çevirib.

SNHR-nin rəhbəri Fadl Əbdülqəni rejimin zorla yoxa çıxan minlərlə insanı qətlə yetirdiyini təsdiqləyən məlumatlara malik olduqlarını bildirib. Onun sözlərinə görə, 3 mindən çox insanın öldürüldüyünə dair sübutlar mövcuddur.

Rejimin süqutundan sonra həbsxanalardan təxminən 24 min insan azad edilsə də, bu, zorla yoxa çıxanların sayının çox cüzi bir hissəsidir. Azad olunanlarla bağlı məlumatlar dəqiqləşdirilsə də, on minlərlə ailə hələ də yaxınlarının taleyinin aydınlaşdırılmasını gözləyir.

Suriyada hələ də onlarla kütləvi məzarlıq tapılmamış vəziyyətdədir. Fadl Əbdülqəni bu məzarlıqların açılmasının və cəsədlərin şəxsiyyətlərinin müəyyən edilməsinin uzun və mürəkkəb bir proses olduğunu vurğulayıb.

Şəbəkə rəhbəri əlavə edib ki, yoxa çıxanların yaxınlarının taleyini bilmək ailələr üçün təbii bir hüquqdur. Lakin ailələrə yalan ümidlər vermək və ya mövcud olmayan gizli həbsxanalar barədə şayiələr yaymaq onların ağrılarını daha da artırır.