Suriya təhlükəsizlik qüvvələri ölkənin sahil vilayəti olan Tərtusdan Livana silah və sursat daşınması cəhdinin qarşısını alıb.
Daxili İşlər Nazirliyindən verilən bəyanatda bildirilir ki, Daxili Təhlükəsizlik Qüvvələri tərəfindən Ümumi Kəşfiyyat Xidməti ilə koordinasiyalı şəkildə keçirilən əməliyyat nəticəsində qanunsuz yolla keçirilməyə hazırlanan avtomat tüfənglər, RPG mərmiləri, silah saxlama qurğuları və müxtəlif növ sursat ələ keçirilib.
Bu, iyul ayında həyata keçirilən oxşar əməliyyatdan sonra qeydə alınan növbəti analoji haldır. Həmin vaxt Daxili İşlər Nazirliyinin xüsusi bölmələri Suriya-İraq sərhədindən ölkə ərazisinə daxil olmaqda olan böyük silah paketinin qarşısını aldıqlarını açıqlamışdılar.
O zaman nazirlik Suriyanın sərhədlərini qorumağın və milli suverenliyi təmin etməyin əsas prioritetlərdən biri olduğunu vurğulamış, ölkə ərazisinin nə silah qaçaqmalçılığı, nə də Suriyaya və ya qonşu dövlətlərə təhlükə yaradan fəaliyyətlər üçün dəhliz və ya baza kimi istifadəsinə icazə verilməyəcəyini bəyan etmişdi.
"Hizbullah"ın təchizat marşrutu
Bu addımlar keçmiş prezident Bəşər Əsədin hakimiyyəti dövründə Suriyanın oynadığı roldan kəskin şəkildə fərqlənir. Həmin dövrdə Livanın "Hizbullah" qruplaşmasına çatdırılması nəzərdə tutulan silah və hərbi texnika İran tərəfindən Suriya ərazisindən sərbəst şəkildə keçirilirdi.
Əsəd hakimiyyəti illərində İsrail İranın Suriyadakı hərbi varlığını genişləndirməsinin və "Hizbullah"a müasir silahlar ötürməsinin qarşısını almaq məqsədilə ölkənin müxtəlif bölgələrində İran və "Hizbullah"la əlaqəli olduğu iddia edilən silah anbarlarına, hərbi obyektlərə və təchizat marşrutlarına dəfələrlə hava zərbələri endirmişdi.
Suriyanın yeni hökuməti isə öz ərazisindən qonşu ölkələrdəki "Hizbullah"a və ya digər silahlı qruplaşmalara silah qaçaqmalçılığı üçün baza və ya tranzit marşrutu kimi istifadə edilməsinə imkan verməyəcəyinə söz verib.
Silah alveri və digər qanunsuz xarakterli cəhdlərdən narahat olan hökumət Livan və İraq da daxil olmaqla, Suriyanın nəzarəti çətin olan uzun sərhədləri üzərində nəzarəti gücləndirməyə çalışır.
Daxili İşlər Nazirliyi müsadirə olunmuş silahların konkret kimə ünvanlandığı və ya hadisə ilə bağlı şübhəli şəxslərin həbs edilib-edilmədiyi barədə ətraflı məlumat verməyib.
