Türkiyədə baş verən yanğınlarla bağlı son vəziyyət açıqlanıb
Türkiyənin kənd və meşə təsərrüfatı naziri İbrahim Yumaklı ölkənin müxtəlif bölgələrində davam edən meşə yanğınları ilə bağlı açıqlama verib. Nazir Aydın vilayətinin Buharkent ərazisində başlayaraq Denizli vilayətinin Buldan rayonuna yayılan yanğının gücünün azaldıldığını bildirib. Onun sözlərinə görə, Bartın vilayətinin Ulus rayonundakı yanğın böyük ölçüdə nəzarət altına alınıb, Aydın vilayətinin Efeler bölgəsindəki yanğının da intensivliyi azaldılıb.
Türkiyənin Denizli şəhərində meşə yanğını baş verib
Əməliyyatlarda 137 su maşını, 12 tikinti texnikası, 74 ilkin müdaxilə maşını və 871 şəxsi heyət iştirak edir. Meşə Təsərrüfatı Baş Direktoru Bəkir Karacabey yanğın bölgəsində vəziyyəti yerindəcə qiymətləndirərək, Dənizli valisi Ömər Faruk Coşkun, AK Partiya Dənizli millət vəkili Şahin Tin, İl Təhlükəsizlik Müdiri Yavuz Sağdıç və Meşə Regional Müdiri Əhməd Köle ilə görüşüb, son vəziyyətlə bağlı məlumat mübadiləsi aparıb. Yanğının nəzarət altına alınması üçün bütün resursların səfərbər edildiyi bildirilir.
Türkiyənin Bartın vilayətindəki yanğın nəzarət altına alınıb
Türkiyənin Bartın vilayətinin Ulus rayonunda meşəlik ərazidə baş verən yanğın nəzarət altına alınıb. Aşağıçerçi kəndi ərazisində başlayan yanğın barədə məlumat verildikdən sonra hadisə yerinə çox sayda yanğınsöndürən briqada və texnika cəlb olunub. Alov və tüstü geniş ərazidə təsirini göstərdiyi üçün yanğına havadan və qurudan müdaxilə edilib. Külək və ərazinin mürəkkəbliyi işləri çətinləşdirib, lakin alovun yayılmasının qarşısını almaq üçün iş texnikası ilə meşəlikdə yol açılıb.
Türkiyənin Bartın vilayətində meşə yanğını baş verib
Türkiyənin Bartın rayonunda meşə yanğını qeydə alınıb. Yanğın Bartının Ulus rayonunda baş verib. Əraziyə çox sayda yanğınsöndürən briqadaları və texnika cəlb olunub. Alov və tüstü geniş sahəyə yayılır, yanğının söndürülməsi üçün havadan və qurudan müdaxilə davam edir. Bartın valisi Nurtaç Arslan da hadisə yerinə gələrək vəziyyətlə tanış olub və məsul şəxslərdən məlumat alıb. O, jurnalistlərə açıqlamasında əhalinin təxliyəsinin gündəmdə olmadığını bildirib.
Türkiyənin Antakya şəhərində meşə yanğını nəzarət altına alınıb
Yanğın dünən yerli vaxtla saat 15:00 radələrində Antakya rayonunda yerləşən Həbib-i Neccar dağında başlayıb. Ərazidən tüstü qalxdığını görən sakinlərin xəbərdarlığı ilə Meşə Təsərrüfatı Regional Müdirliyinin yanğınsöndürmə qrupları dərhal hadisə yerinə sövq edilib. Hava şəraitinin qaralması səbəbindən hava dəstəyi axşam saatlarında dayandırılsa da, yerüstü yanğınsöndürmə əməliyyatları gecə boyu davam edib.
Hatayda meşə yanğını baş verib
Türkiyənin Hatay vilayətində meşə yanğını qeydə alınıb. Yanğın Hatayın Antakya rayonunda Həbib-i Nəccar dağının ətəklərində yerləşən meşəlik ərazidə baş verib.
Sakaryada meşə yanğını baş verib
Hadisə yerinə çoxlu sayda yanğınsöndürmə və xilasetmə qrupları səfərbər olunub. X platformasında yayılan fikirlər, yanğının ciddi təhlükə yaratdığını və yerli sakinlərin narahatlığını əks etdirir. Yanğının səbəbi hələlik müəyyənləşdirilməyib. Qeyd edək ki, Sakaryanın Akyazı rayonunda son illərdə meşə yanğınları ilə bağlı tədbirlər gücləndirilsə də, yay aylarında yüksək temperatur və quru hava şəraiti yanğın riskini artırıb. Ekipajlar alovun nəzarət altına alınması üçün intensiv iş aparır.
İspaniya təbii fəlakət bölgəsinə çevrilir
Nazirlər Şurasının qərarına əsasən, iyunun 23-dən bəri daşqınlardan, avqustun əvvəlindən isə davam edən meşə yanğınlarından zərər çəkən ərazilər rəsmi olaraq fəlakət bölgəsi kimi tanınıb. Təhsil və idman naziri, hökumət sözçüsü Pilar Alegria bildirib ki, ölkənin 17 muxtar icmasından 16-sı bu qərara daxil edilib. İspaniyada indiyədək 407 min hektardan çox ərazi yanğında məhv olub. Daxili İşlər Naziri Fernando Qrande Marlaska meşə yanğınlarını ölkə tarixində ən böyük yanğın fəlakəti adlandıraraq, fəlakət zonası elan olunmuş ərazilərdə yaşayanların qanunvericiliyə uyğun olaraq dövlət yardımı ala biləcəklərini açıqlayıb. Nazir hazırda 15 yerdə iri miqyaslı yanğınların davam etdiyini, fövqəladə vəziyyətin isə hələ də qüvvədə olduğunu bildirib və əhalini ehtiyat tədbirlərinə əməl etməyə çağırıb.
İzmirdə meşə yanğınına müdaxilə davam edir
Yanğın Seferihisar bəndinin yaxınlığındakı meşəlik ərazidə səbəbi hələlik məlum olmayan şəraitdə başlayıb. Güclü küləklər alovun sürətlə yayılmasına səbəb olub. İzmir Meşə Regional Müdirliyinin məlumatına görə, yanğına qarşı 5 təyyarə, 11 helikopter, 21 su maşını, 7 su təchizatı maşını və 2 tikinti texnikası ilə müdaxilə edilir. Ümumilikdə 182 personal alovu nəzarət altına almaq üçün fasiləsiz çalışır. Qeyd edək ki, yanğın Türkiyənin son həftələrdə üzləşdiyi bir sıra meşə yanğınlarından biridir. Ölkənin digər bölgələrində, o cümlədən Aydın, Bolu və Manisada da oxşar hadisələrə qarşı mübarizə aparılır. Azərbaycanın Fövqəladə Hallar Nazirliyinin “BE-200ÇS” amfibiya təyyarəsi də İzmirdəki yanğınların söndürülməsinə dəstək verir. Türkiyə hökuməti vəziyyəti nəzarətdə saxlamaq üçün bütün resursları səfərbər edib, lakin küləkli hava şəraiti yanğınla mübarizəni çətinləşdirir.
Türkiyədə meşə yanğınlarının söndürülməsi davam edir
Meşə Baş Müdirliyi yanğınların tam nəzarət altına alınması üçün əməliyyatların davam etdiyini açıqlayıb. Geliboluda 9 təyyarə, 6 helikopter, 143 texnika və 391 nəfərlik canlı qüvvə ilə alova müdaxilə olunub. Kənd sakinlərinin dəstəyi ilə alovun qarşısı qismən alınıb, Pazarlı və İlqarderə kəndlərindən 126 nəfər təhlükəsizlik məqsədilə təxliyə edilib. Muğlanın Yatağan rayonunda baş verən yanğın havadan və qurudan müdaxilə ilə söndürülüb, soyutma işləri aparılır. Bursanın Orhangazi rayonunda yanğına 2 helikopter, PUA, 8 su maşını və 62 nəfərlik qüvvə cəlb olunub və ərazi nəzarətə götürülüb. İzmirin Menderes rayonunda isə kənd təsərrüfatı sahəsində başlayan yanğın meşəyə keçib, 8 təyyarə, 8 helikopter və 239 nəfərlik personalın səyi ilə nəzarət altına alınıb.
İzmirdə meşə yanğını davam edir
Çile məhəlləsində əkinçilik sahəsində hələ məlum olmayan səbəblərdən başlayan yanğın meşəlik əraziyə keçib. İzmir Meşə Regional Müdirliyi və müvafiq qurumlar yanğının qarşısını almaq üçün genişmiqyaslı əməliyyatlara başlayıb. Hazırda alovla mübarizə üçün 8 təyyarə, 9 helikopter, 25 su maşını, 26 su təchizatı maşını və 4 buldozer səfərbər edilib. Yanğınsöndürmə işləri həm havadan, həm də qurudan intensiv şəkildə davam etdirilir. Hazırda yanğının nəzarət altına alınıb-alınmadığı barədə dəqiq məlumat verilməyib.
İspaniya və Portuqaliyada meşə yanğınları davam edir
Avqust ayındakı yanğınlarda İspaniyada 4 nəfər həyatını itirib. Qalisiya (Ourense, Pontevedra) və Kastiliya və Leon (Zamora, Leon) bölgələri alovların ən çox yayıldığı ərazilərdir. Son 10 gündə yalnız Ekstremadura bölgəsində 17 min hektara yaxın meşə və kənd təsərrüfatı sahəsi yanıb. Ölkə üzrə 2.500-dən çox insan, o cümlədən Leonda 1.523 nəfər evlərindən təxliyə edilib. Onlar hazırda idman zalları, sığınacaqlar və yaxınlarının evlərində yerləşdirilib. İlin əvvəlindən bəri İspaniyada 350 min hektardan çox ərazi məhv olub, bunun 330 min hektarı yalnız avqust ayına təsadüf edir. Yanğınlar səbəbindən doqquz yol bağlanıb, kənd təsərrüfatı və heyvandarlıq sektoru ciddi zərər görüb. La Razon qəzetinin məlumatına görə, yanğınların söndürülməsinə sərf olunan vəsaitin dəyəri 8 milyard avroya, iqtisadi ziyanın miqdarı isə 2 milyard avronu keçib.
