İsrail və Livan nümayəndə heyətləri mühüm danışıqlar üçün ABŞ dövlət departamentinə gəlib
Livan və İsrail nümayəndə heyətləri yeni danışıqlar mərhələsi üçün ABŞ Dövlət Departamentinin qərargahına gəliblər. Birbaşa danışıqlar cümə axşamı və cümə günləri Vaşinqton şəhərində keçiriləcək və görüşlərdə hər iki ölkənin diplomatik nümayəndələri ilə yanaşı ABŞ rəsmiləri də iştirak edəcəklər.
Vaşinqtonda üçüncü raund - Livan, İsrail və Hizbullah nə istəyir?
ABŞ-ın paytaxtı Vaşinqtonda bu gün Livan və İsrail arasında yeni danışıqlar raundu keçirilir. ABŞ vasitəçiliyi ilə baş tutan görüşlər İsrailin Livana qarşı həyata keçirdiyi genişmiqyaslı hücumlardan cəmi bir gün sonraya təsadüf edir. Son hücumlar nəticəsində azı 22 nəfər, o cümlədən 8 uşaq həyatını itirib. İsrail ordusunun endirdiyi zərbələr Livanın cənubundakı yaşayış məntəqələrini, avtomobilləri və Beyrutla ölkənin cənubunu birləşdirən sahil yolunu hədəfə alıb. Gərginliyin artması ötən ilin aprel ayında ABŞ-ın vasitəçiliyi ilə əldə olunmuş atəşkəs razılaşmasına baxmayaraq baş verir. İsrail ordusu bildirib ki, əməliyyatlar zamanı “Hizbullaha məxsus silah anbarları, raket qurğuları və hərbi infrastruktur” vurulub. Buna cavab olaraq Hizbullah İsrail qüvvələrinin Həddəta yaşayış məntəqəsi istiqamətində irəliləməsinin qarşısını aldıqlarını, həmçinin İsrail hərbi mövqelərinə raket və pilotsuz uçuş aparatları ilə zərbələr endirdiklərini açıqlayıb.
