Bakı, AzerVoice

Türk Dövlətləri Təşkilatı (TDT) Ankarada TUSAŞ-ın istehsal obyektində törədilən terror aktını sərt şəkildə qınayıb.

AzerVoice xəbər verir ki, bu barədə beynəlxalq təşkilat rəsmi bəyanat yayıb.

"Böyük kədər və narahatlıqla Ankarada baş verən terror aktını pisləyir və bu xain hücumu şiddətlə qınayırıq. Türkiyə Cümhuriyyətinə və qardaş türk xalqına dərin başsağlığı verir, yaralılara isə tezliklə şəfa tapmalarını diləyirik", - deyə bəyanatda vurğulanır.

Bəyanatda həmçinin qeyd edilib ki, terrorçuluqla mübarizə məsələsində Türk Dövlətləri Təşkilatı üzv ölkələri Türkiyənin yanında yer alır və bu çətin günlərdə Türkiyə ilə həmrəy olduğunu bir daha təsdiq edir.

Xatırladaq ki, Türkiyədə TUSAŞ-ın istehsal obyektində baş verən dəhşətli terrorda 5 nəfər həlak olub, 22 nəfər isə müxtəlif dərəcəli bədən xəsarətləri alıb. Türkiyənin daxili işlər naziri Əli Yerlikaya ilkin araşdırmalara əsasən, bu terror aktının PKK tərəfindən törədildiyini açıqlayıb.