BAKI, AzerVoice, Nailə Babazadə
Qırğızıstanın cənubundakı Cəlalabad bölgəsinin inzibati mərkəzi olan Cəlalabad şəhərinin adının Manas olaraq dəyişdirilməsi qərarının qüvvəyə minməsindən sonra, şəhəri simvolizə edən “Cəlalabad” yazılı köhnə loqo sökülüb və yerinə “Manas” yazılı yeni loqo yerləşdirilib.
AzerVoice xəbər verir ki, şəhərin yuxarı hissəsində keçirilən mərasimdə Qırğızıstan Nazirlər Kabinetinin sədr müavini və Dövlət Təhlükəsizlik Komitəsinin sədri Kamçıbek Taşiyev, yerli rəhbərlər və çoxsaylı sakinlər iştirak ediblər.
Mərasimdə çıxış edən Taşiyev, şəhərin adının dəyişdirilməsi münasibətilə iştirakçıları təbrik edərək, bu qərarın ölkənin strateji gələcəyi nəzərə alınaraq qəbul edildiyini vurğulayıb.
Tədbirdə 8 metr hündürlüyündə və ağ rəngdə hazırlanmış “Manas” şəhər loqosu işıqlandırılaraq ictimaiyyətin ixtiyarına verilib.
Bayram tədbirləri çərçivəsində atəşfəşanlıq nümayişi keçirilib, yerli sənətçilərin çıxış etdiyi konsert proqramı təşkil olunub.
Qeyd edək ki, Cəlalabad şəhərinin adının Manas olaraq dəyişdirilməsini nəzərdə tutan qanun Qırğızıstan Parlamenti tərəfindən 10 sentyabrda qəbul edilmişdi.
Prezident Sadır Caparov qanunu 17 sentyabrda imzalayıb və qərar 27 sentyabrda rəsmi qəzetdə dərc olunaraq qüvvəyə minib.
